Pasi njoftoi përjashtimin nga partia që drejton të Gazment Bardhit, Lulzim Basha ka udhëzuar Enkelejd Alibeajn që të nisë negociatat me aleatët tradicionalë të PD-së me synimin krijimin e një fronti opozitar.
Sipas raportimeve mësohet se Alibeaj ka zhvilluar sot dy takime të ndara me Dashamir Shehin dhe Agron Dukën, përkatësisht kryetarë të LZHK dhe PAA.
Alibeaj, i emëruar nga Basha si Sekretar i Përgjithshëm në atë që njihet si PD-ja e vulës, ka kërkuar nga deputetët e opozitës që të mbështesin propozimet e paraqitura nga Lulzim Basha, një pjesë e të cilave kanë të bëjnë me ndryshime kushtetuese.
Takimi vjen një ditë pasi Sali Berisha njoftoi se po arrihet një unifikim mes deputetëve demokratë dhe atyre të partive aleate lidhur me opozitarizimin në Kuvend ndaj qeverisë Rama.
E ndërsa nga njëri krah, Lulzim Basha po përjashton deputetë të PD-së nga partia që drejton, në anën tjetër po përpiqet të krijojë aleanca me deputetë opozitarë, të cilët deri më tani janë shfaqur neutralë në përplasjet brenda PD-së.
Pak javë më parë, Dashamir Shehi dhe Agron Duka morën një inisiativë për mbledhjen e firmave nga deputetët opozitarë me qëllim paraqitjen e një kërkese në Kuvend për ndryshimin e sistemit zgjedhor.
Discussion about this post