Sali Berisha ndodhet në një nga pikat më ulëta të tij, tha Kryetari i Partisë Demokratike, Lulzim Basha në një “podcast” që u transmetua në profilin e tij në “FB”.
“Nuk më vjen mirë që ndodhet aty”, tha Basha.
Sipas Bashës, nëse Berisha do të kishte dëgjuar këshillat e tij, për të mos e bërë problemin e tij personal pjesë të partisë, nuk do ishte në këtë pikë.
“Në bindjen time ka dëgjuar këshilltarët e gabuar që prej majit të 2021. Po të kishte dëgjuar këshillat që i dhashë unë do ishte më mirë, për të, për familjen e tij, për Pd dhe për Shqipërinë. Këshilla ishte që çështjen e tij të mos e bënte të partisë, për ta lejuar Pd të ecte në trajektoren e saj çka do ishte shumë më mirë për PD dhe shqiptarët”, shtoi Basha.
Ciklin e Berishës në politikë Basha e quan të mbyllur.
“Ai ka pasur një jetë të gjatë, ka pasur pikat e tij të larta, ka tashmë nga më të ulëtat. Më vjen shumë keq siç e thashë, por vendi duhet të ecë përpara. Nuk është ai problemi i këtij vendi, problemi është ai që përmende më herët”, shtoi kreu i PD.
Discussion about this post