Për herë të parë pas humbjes tronditëse në zgjedhjet e 6 marsit, kreu i PD, Lulzim Basha ka pranuar se ka nisur një reflektim të thellë, duke nënkuptuar se edhe mund të dorëhiqet nga posti i kreut të PD.
Nga selia blu, Basha tha se do të mbajë përgjegjësi për humbjen duke respektuar njerëzit dhe kërkesat e deputetëve të PD, shumica dërrmuese e të cilëve i kanë kërkuar dorëheqjen.
“Bëmë mbledhje për 6 marsin, do vazhdojmë me mbledhjen e kryesisë sepse padyshim do marrim përgjegjësi, duke filluar nga unë i pari. Ne jemi në proces vërtetimi dhe duhet të respektojmë njerëzit që kanë mendimet e tyre, është një proces i thellë, me synim interesin më të mirë të demokratëve. Unë jam gati të bëj çdo gjë në interes më të mirë të PD-së! Por, duhet pak durim sepse t’i paraprijmë ngjarjeve kur jemi në proces reflektimi. Është domosdoshmëri, nuk kemi arritur akoma aty, është proces reflektimi. Po bëhet nami me naftën, dhe i pari i qeverisë ia ka mbathur në Dubai, procesi i reflektimit ka nisur dhe do të vazhdojë”, tha Basha.
Kujtojmë se zgjedhjet e 6 marsit ishin një goditje e fortë për PD, deputetët e së cilës kanë kërkuar dorëheqjen e Bashës dhe zgjedhje të reja në parti pas dështimeve të njëpasnjëshme të kreut aktual të PD.
Discussion about this post