Basha thërret Kuvendin e PD-së në 2 shtator, çfarë pritet të ndodhë

Lulzim Basha ka thirrur më datë 2 shtator Kuvendin Kombëtar të Partisë Demokratike. Lajmin e ka bërë të ditur vetë Basha, i cili ka zbuluar edhe logon.

E publikuar fillimisht nga Basha dhe më pas nga të gjithë deputetët mbështetës të tij, logo përmban siglën e Partisë zyrtare dhe një stilizim të shqiponjës së flamurit në ngjyrë portokalli.

Gjithashtu, bëhet me dije se vendi i mbajtjes së Kuvendit, ndryshe nga herët e mëparshme do të jetë Pallati i Sportit Asllan Rusi që pritet të krijojë mundësi për akomodimin e më shumë delegatëve të Kuvendit.

Ky ishte ndër vendimet e para që mori kryesia e partisë fill pas rizgjedhjes së Lulzim Bashës kryetar.

Mbledhja e organit më të lartë drejtues të partisë pritet të jetë një pikë kulmore e asaj se si do të jetë Partia Demokratike pa Sali Berishën.

Agjenda e Kuvendit Kombëtar

-Ndryshime statutore;

– Vendime organizative në përputhje me vendimet statutore;

– Miratimi i agjendës politike të Partisë Demokratike.

Deputeti i Partisë Demokratike, Kreshnik Çollaku, zbulon detaje nga Kuvendi Kombëtar që pritet të mbajë Partia Demokratike më dy shtator.

Sipas deputetit, me mbledhjen e Kuvendit PD synon t’i japë fund paqartësive dhe përplasjeve që kanë shoqëruar Partinë Demokratike gjatë gjithë kësaj periudhe përplasjesh mes dy grupimeve.

Ai nënvizoi se Kuvendi Kombëtar do të shërbejë si pikënisje për hapjen e fushatës për përballjen e Partinë Demokratike me qeverinë.

Ai tha se pas dy shtatorit Partia Demokratike do të bëjë një vlerësim të situatës dhe një formatim të të gjithë strukturave të brendshme të partisë.

“Përveç një vlerësimi të situatës politike në vend, situata me zhvillimet e shumta politike kërkon një përgjigje nga Partia Demokratike në formë të strukturuar. Kuvendi Kombëtar është organi më i rëndësishëm i Partisë Demokratike në një cikël 4- vjeçar, patjetër do të ketë edhe një debat dhe parashikohen diskutime mbi ndryshime statutore për funksionimet, të cilat mendojmë që eksperencën e gjithë këtyre viteve pozitive apo negative do ta materializojmë  në një riformatim të ri të strukturave të Partisë Demokratike.

Do të jetë edhe një proces që do të shtresëzohen, do të hidhen bazat e strukturave të reja të partisë. Pritet një lëvizje që do të prekë çdo segment dhe çdo strukturë të Partisë Demokratike nga qëndra deri në qelizën më të fundit”, – tha Çollaku.