Bledar Lilo dhe Artur Balla janë dy personat e besuar të ish-bosit të naftës Rezart Taçi, të arrestuar sot në Shqipëri për skemën e pastrimit të parave në vlerën 18 milionë euro. Mësohet se, Bledar Lilo është ish-truproja e Taçit dhe aksioner në disa kompani në Shqipëri. Gjithashtu ai dyshohet se ka pastruar paratë në bashkëpunim me një tjetër të besuar të Taçit, kunatin e tij Artur Balla.
Ky i fundit, është djali i gjyqtares së dorëhequr të Tiranës, Dhurata Balla, e cila u tërhoq nga frika se hetimet e procesit të vetingut po thelloheshin dhe KPK i kërkonte më shumë llogari. Sipas njoftimit të publikuar nga vetë KPK, Dhurata Balla me 21 qershor 2021 u dorëhoq pasi iu kërkuan shpjegime lidhur me gjetjet e hetimit administrativ. Balla dha dorëheqjen pasi iu gjetën disa probleme dhe deklarime të pasakta për një hua nga të afërmit si dhe një akt-marrëveshje për ndërtimin e një pallati, e cila nuk u zbatua.
Në deklaratën e vitit 2004 deklaron shitjen e një shtëpie banimi 3+1 në Krujë, pronë e bashkëshortit, në shumën 2,900,000 lekë, por kjo pronë nuk rezulton e deklaruar në vitin 2003 nga subjekti. Edhe në vitin 2005 deklarohet shitja e një automjeti tip “Benz” në shumën 500,000 lekë, i padeklaruar më parë.
Në vitin 2009, subjekti deklaron një aktmarrëveshje me shoqërinë private “3D Konstruksion shpk” për ndërtimin e një godine shumëkatëshe në truallin 650 m2 të deklaruar në vitin 2003 në Krujë. Në vitin 2010, kjo akt- marrëveshje shfuqizohet, pasi firma ndërtuese nuk arrin të marrë lejen e ndërtimit, ndërsa vetë subjekti si pronare trualli ka detyrimin t’i paguajë firmës ndërtuese 20,000 euro për shpenzimet e kryera deri në këtë fazë. Në vitin 2013 deklarohet shlyerja e një huaje prej 1,000,000 lekësh e marrë tek dhëndri, por sipas KPK këto pasuri nuk janë justifikuar me prova bindëse nga Dhurata Balla. E.H/ gijotina.com/
Discussion about this post