Bashkia e Elbasanit ka bërë një tjetër tender pa garë dhe me një konkurrent. Drejtoria e Ujësjellës Kanalizimet Elbasan, e cila varet drejtpërdrejtë nga Bashkia Elbasan, ka hapur procedurën në datën 10 nëntor 2021. Ky tender mban numrin e referencës REF-10934-11-09-2021, për ruajtje me roje fizike të objekteve të Ujësjellës Kanalizime Elbasan dhe ka një fond limit prej 38.601.321 lekë të reja, ose rreth 390 milionë lekë te vjetra.
Në këtë tender ka marrë pjesë në garë vetëm një kompani, UEVI-2015 SHPK, e cila duke mos pasur asnjë konkurrent, është shpallur automatikisht fituese. Duke qenë se procedurat me vetëm një konkurrent konsiderohen me risk, pasi krijojnë dyshime se tenderi shkon për një kompani klienteliste, “Open Data” e ka ngritur flamurin e kuq me mbishkrimin e “mungesës së konkurrencës”.
Por në një kërkim që ka bërë Gijotina.com, kompania UEVI-2015 SHPK është në pronësi të Fatbardha Roka. Fatbardha Roka është hetuar dhe e skeduar nga Prokuroria Përgjithshme si pjesë e familjes së fuqishme Roka në Elbasan, e dyshuar për pastrim parash, ndërkohë që nga ana tjetër vazhdon të fitojë tenderë nga Bashkia e Elbasanit.
Në vitin 2017 Prokuroria e Përgjithshme ka nisur hetim ndaj 66 personave në Elbasan lidhur me pasuritë e tyre. Fatbardha Roka ka qenë objekt i prokurorisë si përfaqësuese e familjes Roka, ku sipas Drejtësisë, është një nga 15 familjet e dyshuara për pastrim parash në Elbasan. Dokumentet tregojnë se Fatbardha Rokës dhe familjes që ajo përfaqëson jo vetëm nuk është “ngacmuar” nga drejtësia për asnjë moment, por institucionet publike në Elbasan qëndrojnë në rresht para saj.
Fatbardha Roka nisi të marrë para nga Bashkia e Elbasanit që kur kjo drejtohej nga ish-kryebashkiaku Qazim Sjedini, ndërsa kulmin e xhiros vjetore po e arrin me kreun e ri të Bashkisë, Gledian Llatjan.
Gijotina.com
Discussion about this post