Kolegji Zgjedhor vendos rinumërimin e votave për Bashkinë e Kuçovës.
Votat do të numërohen në 18 kuti, ndërsa ankimimi në Kolegj u bë nga koalicioni “Bashkë Fitojmë” dhe kandidati Lefter Maliqi.
Rinumërimi i 18 kutive të Kuçovës do të bëhet të premten, më 30 qershor, në orën 9:00 në ambientet e KQZ.
Kolegji Zgjedhor mori në shqyrtim ankimimin e koalicionit Bashkë Fitojmë dhe kandidatit të saj Lefter Maliqi për rezultatin e zgjedhjeve në bashkinë e Kuçovës.
Kandidati Maliqi dhe përfaqësuesit ligjor të koalicionit kërkuan nga trupa e Kolegjit që të shpallë pavlefshmëri për zgjedhjet e 14 majit.
Kandidati i opozitës pretendon për manipulim masiv votash, ndërrim kutish, mungesë dokumentacioni në kutitë zgjedhore, dhe mbi të gjitha mungesën e kodeve të sigurisë.
Gjatë seancës gjyqësore që zgjati rreth 9 orë, Kolegji Zgjedhor kqyri pamjet e kamerave të disa qendrave të votimit, ku u konstatua se në disa prej tyre kishte votim familjar, vëzhgues që shkonin brenda dhomës së fshehtë të votimit e vëzhgues që ndihmonin votuesit në palosjen dhe futjen në kuti të votave.
Sipas paditësit, votim familjar ka pasur të paktën në 1254 raste.
Po ashtu, nga pamjet filmike të shfaqura në seancë u konstatuan disa qendra votimi ku kamera e KQZ nuk kishte funksionuar fare, në disa të tjera ishte e shfokusuar, si edhe raste ku nga këndi i vendosjes së saj nuk shquheshin dhomat e fshehta dhe kutitë e votave. Po ashtu, u denoncuan ndryshimi i vulave, mungesa e procesverbaleve në kutitë e votimit dhe votime fiktime, me karta ID të personave që ndodhen jashtë vendit.
Discussion about this post