Menjëherë pas urdhrit të shefit të qeverisë, duket se dhe Bashkia e Mallakastrës, ashtu si shumë bashki të tjera të Qarkut të Fierit, po përgatitet të dërgojë plehrat në Inceneratorin e Fierit. Lajmin e ka konfirmuar kryebashkiaku i Mallakastrës Qerim Ismailja, një ditë pas mbledhjes që 61 kryebashkiakëve të vendit që zhvilluan me kryeministrin Edi Rama.
Në një bisedë telefonike për mediat, kreu i Bashkisë së Mallakastrës u shpreh se shumë shpejt do të nënshkruhet marrëveshja me inceneratorin e Fierit.
“Ne do e mbulojmë atë (vendgrumbullimin e mbetjeve në Mallakastër), por do të nënshkruhet kontrata dhe s’do të ketë më mbetje. Domethënë nga fillimi i vitit do të kalojnë në Fier, sa të bëhen procedurat, do të mbyllet” – u shpreh Qerim Ismailaj.
Ndërsa për pagesat dhe shpenzimet, Ismailja është shprehur se do të ketë rritje taksash për disa kategori biznesesh të mëdha.
“Ajo është pjesë e paketës fiskale, por nuk besoj se do të ketë rritje të taksave. Mund të ketë vetëm për një kategori biznesesh të mëdha” – tha më tej Ismailaj.
Për këtë çështje kryebashkiaku i Mallakastrës Qerim Ismailaj i ka parashtruar kërkesën Këshillit Bashkiak që në projektbuxhetin e bashkisë për vitin 2022 të shikohen dhe shpenzimet shtesë për transportin e plehrave pasi mbetjet urbane do të shkojnë në inceneratorin e Fierit.
