Kryetarja e Bashkisë së Kurbinit, Majlinda Cara dhe disa zyrtarë të tjerë të njësisë vendore dhe Kadastrës do të hetohen nga Prokuroria për një aferë të dyshuar me një tokë bujqësore.
Vendimi është marrë këtë të hënë nga Gjykata e Lezhës, pas një kallëzimi që ka bërë një qytetar për tjetërsim dhe shkatërrim të pronës së tij. Organi i akuzës kishte dalë në konkluzionin se nuk ka elementë të veprës penale dhe e kishte dërguar çështjen për pushim në gjykatë, por kjo e fundit vendosi të mos e pranojë.
Denoncuesi Anton Meta thotë se bashkia i ka marrë në mënyrë joligjore 12 hektarë tokë bujqësore dhe ka hedhur inertet e objekteve të dëmtuara nga tërmeti i nëntorit të vitit 2019.
Në verën e dy viteve më parë, Meta zhvilloi dhe një grevë disa ditore para kryeministrisë, duke kërkuar nga institucionet zgjidhjen e problematikës me pronën e tij. Për mediat, Meta ka rrëfyer se ishte në emigracion dhe kur u rikthye, e gjeti tokën e përfituar me ligjin 7501, të mbuluar nga inertet.
Discussion about this post