Bashkimi Evropian ka hequr sanksionet ndaj tre oligarkëve rusë, të ndëshkuar më parë për rolin e tyre në pushtimin e Ukrainës.
Blloku 27-anëtarësh ngriu asetet dhe ndaloi rreth 1.600 individë dhe entitete ruse që të hynin në territorin e tij pas nisjes së luftës.
Sipas disa zyrtarëve evropianë, që kanë folur në kushte anonimati, kjo paketë sanksionesh u zgjat me 6 muaj të tjerë.
Tani, tre personat që janë hequr nga lista e zezë e BE-së janë biznesmenët Grigori Berezkin, Farkhad Akhmedov dhe Aleksander Shulgin.
Oficeri i ushtrisë ruse Georgi Shuvaev, që mbeti i vrarë në Ukrainë, u hoq gjithashtu nga lista.
Shfuqizimi i sanksioneve vjen teksa Brukseli po përballet me aksione ligjore të shumta të ndërmarra nga oligarkët rusë.
Sipas BE-së, Grigori Berezkin, grupi i të cilit, ESN, ka interesa në sektorët e medias dhe energjisë, është i afërt me Putin dhe kompanitë e tij kanë mbështetur materialisht Moskën.
Miliarderi Farkhad Akhmedov, i lindur në Kazakistan dhe aktiv në sektorin e energjisë konsiderohet gjithashtu një aleat kyç i Kremlinit.
Ndërsa Aleksander Shulgin, pronar i platformës së tregtisë online “Ozon”, mori pjesë në një takim të oligarkëve rusë dhe presidentit Putin, që u mbajt në fillim të pushtimit. Takimi kishte si synim mbështetjen e luftës nga biznesmenët rusë.
Discussion about this post