Bayern nuk ka mëshirë, e kthen në stërvitore ndaj Schalke 04

Bayern ka treguar se në Bundesliga, sot për sot, është skuadra më e frikshme e futbollit gjerman.

Bavarezët nuk treguan mëshirë në duelin e pasdites së sotme përballë Schalke 04, duke fituar me rezultatin e thellë 6-0.

Takimi i vlefshëm për javën e 32-të të Kampionatit Gjerman të Futbollit nisi shkëlqyeshëm për rekordmenët nga jugu i vendit, të cilët kaluan në avantazh me anë të legjendës Thomas Mueller, në minutën e 21’.

Ende pa e proçesuar atë që ndodhi, “Die Koenigsblauen” pësuan edhe golin e dytë, 8 minuta më vonë. Nga pika e bardhë e penalltisë, Kimmich u tregua i saktë, duke mos i dhënë asnjë mundësi portierit kundërshtar.

Me avantazhin prej 2 golash të Bayernit, u mbyll pjesa e parë. Pjesa e dytë nisi njësoj si fraksioni i parë i lojës. Vendasit realizuan, 5 minuta pas rifillimit të lojës me anë të Serge Gnabry, i ndihmuar nga asistimi i Joao Cancelo.

Sulmuesi anësor i Kombëtares gjermane, nuk u mjaftua me vetëm një gol, duke shënuar përsëri për “Të Kuqtë”, në minutën e 66’.

Me Schalken tashmë të dorëzuar, lojtarët e drejtuar nga Thomas Tuchel, përfituan nga rasti për t’u zbavitur, me Jamal Musiala që në minutën e 80’, asistoi për golin e pestë të takimit, francezin Mathys Tel.

Në 5 minutat e fundit të kohës së rregullt, u aktivizuan Mane edhe Upamecano, duke zëvendësuar Musiala dhe De Ligt.

Në shtesë pati kohë dhe për golin e gjashtë të realizuar nga Mazraui.

Me këtë fitore bindëse, Bayern ruan kreun e renditjes, në kuotën e 68 pikëve, e ndjekur nga BVB Dortmund, e cila ka për momentin 4 pikë më pak (ka ende për të luajtur ndeshjen e saj).

Nga ana tjetër, Schalke 04 duhet të reagojë sa më shpejt, në mënyrë që mos kthehet në Bundesligën e dytë./m.b /gijotina.com