Trajneri gjerman i Bayernit të Mynihut, Thomas Tuchel pranoi se Benjamin Pavard ka kërkuar largimin nga klubi rekordmen i Bundesligës, megjithatë theksoi se bavarezët nuk do ta lënë të lirë, pa gjetur më parë zëvendësuesin e tij, duke lënë të kuptohet se transferimi i tij te Interi nuk është kaq i sigurt.
E kanë të qartë këtë edhe drejtuesit e Interit, që kanë nisur tashmë punën edhe për planin B, i cili quhet Per Schuurs.
Mbrojtësi holandez u transferua në Serinë A te Torino verën e kaluar dhe bëri një sezon për t’u admiruar, teksa te Interi e shohin si alternativën e duhur, nëse nuk arrijnë dot te Pavard.
Holandezi 24-vjeçar luan fiks në të njëjtin pozicion, në krahun e djathtë të mbrojtjes me tre të Ivan Juric dhe nuk do t’i duhet kohë për t’u ambientuar, qoftë me futbollin italian, qoftë me skemat e trajnerit Inzaghi.
Kartoni i tij vlerësohet rreth 25 milionë euro, megjithatë marrëveshja mund të mbyllet për një shifër mes 18 dhe 20 milionë eurove.
Gjithsesi në Milano kanë vendosur të presin Pavard deri në përfundim të ndeshjes me Cagliarin, të hënën në mbrëmje dhe më pas janë gati të hidhen në sulm për Schuurs, që ka tashmë miratimin e Simone Inzaghit./SSA
Discussion about this post