Bashkimi Evropian mbeti i ndarë sot mbi mënyrën se si të reagojë ndaj situatës katastrofike humanitare në Rripin e Gazës dhe mbi masat që duhen marrë ndaj Izraelit, gjatë një takimi të ministrave të Jashtëm të BE-së në Kopenhagë.
Komisioni Evropian kishte propozuar pezullimin e financimit të kërkimit për kompanitë izraelite, pas një rishikimi të brendshëm të BE-së, i cili përfundoi se veprimet e Izraelit në këtë territor shkelin marrëveshjen BE-Izrael, që detyron të dyja palët të respektojnë të drejtat e njeriut.
Gjermania ka qenë ndër vendet që kanë bllokuar këtë masë.
“Berlini për momentin nuk është gati të mbështesë propozimin e sanksioneve, tha ministri i Jashtëm gjerman Johan Wadephul. “Masa e planifikuar ka të ngjarë të mos ndikojë në vendimmarrjen politike dhe veprimet ushtarake të Izraelit në Rripin e Gazës, prandaj Gjermania nuk është e bindur për këtë propozim”, shtoi ai.
Wadephul theksoi se Gjermania po kufizon dorëzimin e armëve për Izraelin, një masë që sipas tij është shumë e nevojshme.
Shefja e diplomacisë së BE-së, Kaja Kallas, tha se nuk është “shumë optimiste” për të arritur një konsensus mbi reagimin ndaj luftës në Gaza, pasi propozimi i saj për pezullimin e financimit të kërkimit nuk ka arritur mbështetjen e shumicës së kërkuar.
Planet duhet të miratohen nga një shumicë e kualifikuar, që do të thotë të paktën 15 nga 27 shtetet anëtare të BE-së, që përfaqësojnë të paktën 65% të popullsisë së bllokut. Kjo i jep Gjermanisë, shteti më i madh i BE-së me 83.5 milion banorë, një ndikim të madh.
“Kur jemi të ndarë, nuk kemi një zë të unifikuar. Pa një zë të unifikuar, në këtë temë nuk kemi ndikim në skenën globale”, shtoi Kallas.
Ndërsa disa vende të BE-së, si Gjermania dhe Austria, mbeten të rezervuara për të mbështetur sanksionet, disa të tjera, përfshirë Danimarkën, Spanjën dhe Irlandën, po kërkojnë një qëndrim më të fortë.
“Tani duhet të kthejmë fjalët në veprime”, tha ministri i Jashtëm danez, Lars Lokke Rasmussen “Ne e konsiderojmë Izraelin dhe popullin izraelit si miq. Por kemi një problem me qeverinë aktuale”, shtoi ai.
“Danimarka është gati të kufizojë tregtinë me Izraelin, të vendosë ndalim për produktet nga vendbanimet izraelite në Bregun Perëndimor ose të vendosë sanksione ndaj ministrave izraelitë”, tha Rasmussen.
Discussion about this post