Udhëheqësit europianë kanë mbështetur përpjekjet e presidentit amerikan Donald Trump për ndalimin e luftës ruse dhe janë shprehur kundër ndryshimit të kufijve të Ukrainës.
“Ne jemi të gjithë të bashkuar në dëshirën tonë për një paqe të drejtë dhe të qëndrueshme, të merituar nga populli i Ukrainës.
Ne e mbështesim fuqimisht qëndrimin e Presidentit Trump që luftimet duhet të ndalen menjëherë dhe që vija aktuale e kontaktit duhet të jetë pika fillestare e negociatave. Ne mbetemi të përkushtuar ndaj parimit që kufijtë ndërkombëtarë nuk duhet të ndryshohen me forcë”, thuhet në deklaratën e përbashkët.
Në deklaratën e nënshkruar nga Presidenti ukrainas Volodymyr Zelensky, Kryeministri i Mbretërisë së Bashkuar Keir Starmer, Kancelari gjerman Friedrich Merz, Presidenti francez Emmanuel Macron, Kryeministrja italiane Giorgia Meloni, Presidentja e Komisionit Evropian Ursula von der Leyen dhe udhëheqës të tjerë evropianë, grupi deklaroi se presidenti rus Vladimir Putin me taktikat zvarritëse dhe duke zgjedhur dhunën e shkatërrimin, tregon se e vetmja palë serioze për paqen është Ukraina.
“Prandaj, jemi të qartë se Ukraina duhet të jetë në pozicionin më të fortë të mundshëm – para, gjatë dhe pas çdo armëpushimi. Ne duhet të rrisim presionin mbi ekonominë dhe industrinë e saj të mbrojtjes të Rusisë, derisa Putini të jetë gati të bëjë paqe. Ne po zhvillojmë masa për të përdorur vlerën e plotë të aseteve sovrane të palëvizura të Rusisë në mënyrë që Ukraina të ketë burimet që i nevojiten”, thuhet më tej në deklaratë.
Udhëheqësit do të takohen më vonë këtë javë në Këshillin Evropian dhe në formatin e Koalicionit të Gatishmërisë për të diskutuar se si ta çojnë përpara këtë punë dhe të mbështesin më tej Ukrainën.
Discussion about this post