Bashkimi Evropian ka deklaruar se nuk i njeh talebanët dhe nuk po zhvillon bisedime politike me ta. Këtë deklaratë e ka bërë Presidentja e Komisionit Evropian, Ursula von der Leyen, pasi vizitoi një qendër pritëse në Madrid për punonjësit afganë të institucioneve të BE, që tashmë janë evakuuar nga Kabuli, ku bëri thirrje që të ndihmohen refugjatët afganë.
“Në duhet të ndihmojmë, jo vetëm afganët që mbërrijnë këtu në Spanjë, por edhe ata që kanë mbetur në Afganistan. BE -ja është e përkushtuar në mënyrë të vendosur për të vazhduar mbështetjen e OJQ-ve që veprojnë në vend”, u shpreh Presidentja e KE-së.
Po ashtu ajo kërkoi gjetjen e një zgjidhje edhe për ata që nuk mund të qëndrojnë në shtëpitë e tyre, ndërkohë që më herët kancelarja gjermane Angela Merkel ka pranuar se rezistenca e ushtrisë afgane kundër talebanëve ishte gjykuar gabimisht, pasi mendohej se do të ishte më e fortë. Situata në Kabul aktualisht duket kaotike, ku punonjësit e qeverisë nuk janë lejuar të shkojnë në punë, ndërsa SHBA ka këshilluar amerikanët e mbetur në Afganistan që të shmangin udhëtimet drejt aeroportit.
