Ndërsa dekreton pa bërë rezistencën edhe më të vogël për ligje të Qeverisë që kanë prodhuar debate dhe kundërshti jo thjesht politike, Presidenti Bajram Begaj prej kohësh mban peng në sirtarët e Presidencës dhënien e nënshtetësisë për talente të kombëtares U-21 apo të ekipeve kombëtare të moshave.
Duket se Begaj ka vendosur dy standarde: atë të dekretimit, qoftë edhe në heshtje të çdo drafti që mban firmën e Edi Ramës, dhe zvarritjen apo mbajtjen peng të çdo akti tjetër, në fund të të cilit nuk ndodhet firma e Kryeministrit, apo e dikujt tjetër të deleguar prej tij.
Nëse doni një fakt, mjafton të shihet zvarritja e pakuptimtë që Presidenti i bën dekreteve për ti dhënë nënshtetësinë shqiptare lojtarëve të ekipeve kombëtare të moshave dhe Kombëtares së futbollit, megjithëse në Presidencë ndodhen dosjet me dokumentacionin e plotë dhe të rregullt.
Janë disa emra që presin firmën e Presidentit për të marrë nënshtetësinë dhe më pas të kenë dritën jeshile për t’iu bashkuar Kombëtares U21 që drejtohet nga Alban Bushi, ndërkohë që në prag janë dy sfida, ajo ndaj Armenisë dhe tjetra ndaj Rumanisë.
E gjitha kjo ndodh kur në njërën anë Presidenti pothuajse çdo ditë firmos dekrete për dhënie nënshtetësie apo heqjen dorë prej saj, ndërsa në anën tjetër Edi Rama flet për “pasaportat e arta”.
Por Presidenti duket se e ka të vështirë që në morinë e punëve të shumta që kryen, në angazhimet e tij, të gjejë kohën dhe të hedhë firmën e tij, mbi listën me emrat e talenteve të futbollit, të cilët me përkushtimin e tyre, mund të kontribuojnë për imazhin e vendit shumë më tepër se çdo angazhim i Bajram Begajt.
Presidenti duhet ta kuptojë se ata që presin të marrin nënshtetësinë shqiptare kanë refuzuar ofertat nga Gjermania apo Zvicra, kanë zgjedhur të veshin fanellën e kombëtares shqiptare dhe duan të ngrenë lart flamurin kuq e zi.
Të paktën si një ish-ushtarak, aq më tepër gjeneral i Forcave të Armatosura, Begaj duhet të ndjehet dy herë i obliguar për të firmosur dekretet, që nesër të mos skuqet apo të mos nxihet.
Deri më tani, Begaj ka vonuar për 12 muaj pajisjen me pasaporta shqiptare të talenteve të kombëtares së moshave. Ka bllokuar një proces zinxhir, pa dhënë asnjë shpjegim, madje pa nxjerrë asnjë justifikim.
Thjesht Presidenti ka vendosur ti mbajë dosjet në sirtar, ndoshta ka menduar ta zgjasë sa më shumë procesin deri sa fletët të zverdhen, por në fund mund të marrë si shpagim “nxirjen e fytyrës”.
Discussion about this post