Dy ligjet e miratuara në seancën e fundit të sesionit parlamentar, atë të 20 korrikut, njëri për legalizimin e kanabisit për qëllime mjekësore dhe industrial dhe tjetri për mjekët e rinj, do të hyjnë në fuqi sapo të botohen në Fletoren Zyrtare.
Pavarësisht se Presidenti Bajram Begaj nuk nxorri dekret lidhur me dy ligjet, Kushtetuta parashikon se kur Kreu i Shtetit nuk shprehet, ligjet miratohen në heshtje. Referuar raportimeve, stafi i Presidentit nuk ka gjetur argumente ligjore për të rikthyer ligjet për shqyrtim në Kuvend. Por pyetja që lind është pse atëherë Kreu i Shtetit nuk i ka dekretuar?
Gjithsesi kjo nuk ka asnjë vlerë, pasi si legalizimi i kanabisit, ashtu edhe ligji për mjekët e rinj, pritet të hyjnë në fuqi në fillim të shtatorit, kohë kur pritet të përmbushet afati ligjor për botimin në Fletoren Zyrtare.
Në këtë mënyrë 400 maturantët që do të shpallen fitues në Mjekësi do të duhet që të lidhin më parë një kontratë me Ministrinë e Shëndetësisë, se pranojnë të ofrojnë shërbim shëndetësor për 5 vite në vendin e tyre pas përfundimit të studimeve e më pas të pajisen me diplomë.
Studentët e mjekësisë protestuan përpara se ky ligj të votohej në Parlament, por shpresonin se nuk do të dekretohej nga Presidenti, i cili mund ta kthente për rishqyrtim.
Por Presidenti i Republikës i cili vjen nga fusha e mjekësisë, ka zgjedhur të mos shprehet, pra as e ka dekretuar por as nuk e ka kundërshtuar duke e kaluar në heshtje dhe duke i hapur rrugë hyrjes në fuqi të ligji .
“Unë e shoh jashtë karrierën time, kam hedhur edhe dy provime jashtë”, shprehet një student.
Ndërkohë ligji tjetër që hyn në fuqi është legalizimi i kanabisit për qëllime mjekësorë dhe industriale. Edhe kjo nismë, e kundërshtuar fort nga opozita dhe aktorë të shoqërisë civile, në heshtje ka marrë miratimin e Presidentit, i cili me pozicionin e zgjedhur, ka shmangur një përplasje me Qeverinë dhe mazhorancën socialiste, nëse do të kthente në Kuvend për rishqyrtim nismat e miratuara, pavarësisht kontestimeve.
Ligji i 3-të që Bajram Begaj ka në tavolinë është ai mbi Akademinë e Shkencave. Nuk dihet nëse Presidenti do të nxjerrë një dekret mbi këtë ligj, apo sërisht do e kalojë në heshtje, draftin e miratuar me votat e socialistëve, por që cilësohet si puç institucional nga deputetë të opozitës dhe akademiku Artan Fuga.
Të paktën dy deputete të PD-së, Flutura Açka dhe Ina Zhupa, i janë drejtuar Presidentit me kërkesa të veçanta për të mos dekretuar ndryshimet në ligjin për Akademinë. Tashmë duhet pritur nëse Kreu i Shtetit do të preferojë të heshtë, duke i hapur rrugën hyrjes në fuqi të draftit ligjor, apo do të rikthejë në Kuvend ligjin e 3-të të Ramës.
Discussion about this post