Beleri në burg, Greqia nuk dorëzohet/ Dendias: Shqipëria rrezikon integrimin, problemi është në Bruksel

Athina zyrtare insiston në lirimin nga burgu të Fredi Belerit, kryebashkiakut të Himarës, i arrestuar dy ditë para zgjedhjeve të 14 majit, me akuzën e shit-blerjes së votave.

Ministri i Jashtëm grek, Nikos Dendias, vijon t’I përmbahet tezës se arrestimi i Fredi Belerit është në kundërshtim me shtetin e së drejtës, dhe kjo sipas tij, ajo nuk prek vetëm marrëdhëniet mes Shqipërisë dhe Greqisë, por edhe raportet mes Tiranës dhe Brukselit.

“Pala greke është njohur me dosjen, e kemi lexuar dhe e dimë se çfarë përmban ajo, nëse është serioze ose jo. Unë dua ta ritheksoj se mbajtja në burg e një kryebashkiaku të zgjedhur me atë dosje dhe pa u gjykuar akoma mendoj se është përtej shtetit të së drejtës në një vend europian.

Mendoj se është mirë që pala shqiptare ta kuptojë se për të shkuar drejt familjes europiane është e domosdoshme që të kemi një shtet të së drejtës, për të gjitha vendet, jo vetëm për Shqipërinë.  Me këtë sjellje të qeverisë shqiptare kam frikë se ngrihen pikëpyetje serioze në këtë drejtim.

Nuk e konsideroj si një çështje vetëm mes Greqisë dhe Shqipërisë, është një çështje e Shqipërisë me Bashkimin Europian që ka të bëjë me shtetin e së drejtës.

Jam tejet i mërzitur sepse kam punuar shumë për marrëdhëniet shqiptaro-greke, besoj shumë në perspektivën europiane të Shqipërisë, besoj se Shqipëria dhe Greqia mund të jenë miqtë dhe aleatët më të mirë siç besojnë dhe shumë të tjerë në Greqi dhe Europë por ka disa kritere që duhen përmbushur. Duhen të bëjnë shumë kujdes me këtë çështje”, tha ai për mediat greke.

Beleri, megjithëse në qeli, arriti të fitojë Bashkinë e Himarës, me 19 vota diferencë ndaj Jorgo Gorës, i cili mbështetej nga Partia Socialiste.

Nuk dihet nëse Beleri do të arrijë të fitojë lirinë deri në muajin gusht, kohë kur i skadon mandati si kryebashkiak, nëse nuk betohet para Këshillit Bashkiak. Beleri me fitoren në 14 maj bëhet kryebashkiaku i parë në 32 vite që arrin të marrë mandatin si i zgjedhur, duke qenë në burg, ndërsa në 2001 pati një precedent të ngjashëm kur Azgan haklaj merrte mandatin e deputetit, megjithëse ndodhej në paraburgim.

Nëse Beleri nuk arrin të betohet para Këshillit Bashkiak, në detyrë mbetet paraardhësi i tij, Jorgo Goro, një situatë e ngjashme kjo me atë të Shkodrës pas zgjedhjeve të 2019-ës.