Athina zyrtare ka reaguar lidhur me vendimin e Apelit të GJKKO që la në fuqi masën e arrestit me burg për Fredi Belerin, i cili në 14 maj mori mandatin e kryebashkiakut të Himarës.
Në një reagim të Ministrisë së Jashtme greke, thuhet se në rastin e Belerit nuk ka pasur një trajtim të drejtë pasi nga 31 denoncime për krime elektorale vetëm kryebashkiaku i Himarës ndodhet në burg.
Gjithashtu Athina zyrtare shprehet se lënia në burg e Belerit është kundër dispozitave të shtetit.
“Vendimi refuzues i sotëm ndaj Apelit të Kryetarit të zgjedhur të Bashkisë së Himarës, Fredi Beleri dhe lënia në paraburgim nuk rezulton të përputhet me dispozitat e shtetit të së drejtës, si dhe nuk është trajtim i drejtë i një përfaqësuesi të zgjedhur të pushtetit lokal, pasi, siç vihet re nga njoftimi i Gjykatës së Posaçme të Shqipërisë është i vetmi i arrestuar në 31 akuza të ngritura për shkelje të rregullores zgjedhore.
Vendimi gjithashtu ngre pikëpyetje për ekzistencën e arsyeve politike në mbajtjen në paraburgim, pasi shkakton pengesa esenciale në marrjen e detyrës si kryebashkiak”, thuhet në reagimin e Ministrisë së Jashtme.
Discussion about this post