Deputeti i PD-së, Belind Këlliçi, ka deklaruar sot gjatë një interviste televizive se ata po vuajnë sot pasojat e gabimeve që kanë bërë vetë më parë. Si një lëvizje të gabuar dhe që dëmtoi shumë PD-në, ai ka konsideruar mos marrjen pjesë në zgjedhjet lokale. Gjithsesi ai tha se ndryshimet që propozon PD për reformën territoriale janë të nevojshme.
Sa i përket përplasjeve brenda PD-së, Këlliçi i cilësoi si një debat i dëmshëm që bëhet në publik dhe si ai duhet të zhvillohet brenda strukturave. Sipas tij sa shumë të zgjatet ky debat, aq më shumë do t’i zgjatet pushteti Edi Ramës.
“Kush thotë se situata është tejet e qetë gënjen, ka një problem të brendshëm, që i takon ta zgjidhë vetë PD-ja, ka dalë jashtë shinave. Ky debat mendoj se sa më shumë kohë kalon aq më shumë dëm i bën shtetit në përgjithësi, se PD-ja është pasuri kombëtare, morale e legjitime. Në zgjidhjen e këtij ngërçi duhet ulur retorika ndarëse, duhet folur më çdo demokrat për të zgjidhur problemet me njëri-tjetrin, e vërteta deri në fund të do ta na çojë në zgjidhjen e krizës së imponuar”, tha Këlliçi.
Në fakt përveç atyre anëtarë të PD që janë ndarë ca nga Basha dhe ca nga Berisha, ka dhe nga ata deputetë që e konsiderojnë të panevojshëm këtë përplasje, sidomos në situatën e vështirë që ndodhet tani PD.
