Në duart e SPAK është një përgjim i Erion Veliajt, i cili nga qelia komunikon me bashkëshorten dhe e udhëzon se “shko e thuaji Ramës se, Belinda i ka paguar Olsit 2 mln euro në Greqi”. Kështu deklaroi kryetari i PD Sali Berisha, gjatë një konference për mediat këtë të premte, teksa u ndal te çështja “Veliaj”.
Berisha i mëshoi qëndrimit të shpalosur më herët, se pas dosjes kundër Veliajt qëndron vetë shefi i tij politik, Edi Rama. Sipas Berishës, Rama “e lëshoi se Erionin, ai bëri gabimin fatal se u paraqit si zëvendësi i tij”.
“Mos mendo ti se e ka lëshuar Rama atë për arsye tjetër. Absolutisht jo, se e dinte se në 12 maji i zinte vendin ai. Ishte i papërmbajtur në karrierë”, tha Berisha.
Në seancën e zhvilluar më herët gjatë javës në Apelin e GJKKO, prokurorët e SPAK paraqitën si prova disa përgjime të Veliajt, për të argumentuar se kryebashkiaku nuk duhet të lirohet nga qelia.
Për këto përgjime, Berisha u shpreh një ditë më parë se ishin një kurth që i kishte përgatitur Edi Rama në bashkëpunim me Ulsi Manjën, kreu i ministrisë së Drejtësisë, që ka në varësi drejtoritë e burgjeve.
Dhe sipas Berishës, një nga këto përgjime është edhe komunikimi i Veliajt me bashkëshorten Ajola Xoxa, edhe ajo nën akuza penale, ku flitet për 2 milion euro që supozohet se zëvendëskryeministrja Belinda Balluku “i ka paguar” vëllait të kryeministrit, Olsi Rama.
“…Tha më mirë i futi dhe ato çimkat me Uluziun, ja nxorrën regjistrimet ku i thotë ndër të tjera, Ajolës, shko e thuaji Ramës se, Belinda i ka paguar Olsit 2 mln euro në Greqi. Dhe ajo shkon i thotë, ajo nuk e dinte se çdo operacion aty drejtohej nga Rama. Midis të tjerave, se i keni marrë vesh ju këto, por nuk i publikoni. Plus gjëra të tjera, çfarë kishin aty ato regjistrime të Uluziut dhe Ramës”, tha Berisha në konferencën për mediat.
Deri më tani, nuk ka pasur asnjë reagim nga kryeministri Rama apo ministrat Manja e Balluku për akuzat e Berishës.
Discussion about this post