Kryebashkiaku i Shkodrës, Benet Beci ndjek trendin global të mbrojtjes atmosferës dhe ka vendosur të blejë makina elektrike. Por Beneti nuk e harron zakonin e vjetër (korrupsionin) edhe kur ndjek trendin më të ri!
Bëhet fjalë për prokurimin me objekt Loti i I-rë: Blerje automjete vetura elektrike, të zhvilluar me 3 nëntor 2023 dhe më datë 16 nëntor 2023 është shpallur fituesi. Ky është vetëm Loti i parë dhe Beci ka menduar të shpenzojë 140 milionë lekë. Me këto para parashikohet të blihen 5 autovetura për punonjësit e bashkisë dhe 7 biçikleta elektrike për policinë bashkiake.
Në dokument nuk parashikohet se ku janë mungesat që duhet të zëvendësojë Beci, sepse deri më sot stafi i bashkisë nuk ka pasur problem në lëvizjen me makinat që ka në dispozicion.
Në fakt, gjithçka është bërë shpejt e shpejt, në funksion të përfitimit dhe përvetësimit me fondet e bashkisë. Shohim se brenda një ditë është bërë mbyllja e afatit për dorëzimin e ofertave. Duke qenë se është paraqitur vetëm një ofertë, brenda një ditë ka përfunduar edhe mbajtja e tenderit për shqyrtimin e dokumenteve.
Është e qartë që në atë ditë, Beci vendosi edhe fituesin, pasi u paraqit vetëm kompania “ALBANIA MOTOR COMPANY”sh.p.k. Përderisa nuk u bë anulim procedure, është e dukshme që po favorizohet pronari i firmës, Ardian Dulaku.
Kontrata abuzive është mbajtur larg syve të publikut për nja dy javë, ndërsa është publikuar më datë 16 nëntor 2023. Do ishte i vlefshëm ky afat nëse Beci dhe stafi i tij do të shqyrtonin oferta, por në këtë rast nuk kishin ç’të verifikonin.
Ndërkohë, monitoruesi i pavarur Open Data Albania ka vulosur me “Flamur të kuq” këtë tender luksoz. Kjo është shenja e riskut të korrupsionit që mbart procedura e prokurimit.
Por nuk mbaron këtu. Madje tani do të tregojmë një nga arsyet pse tenderi është zhvilluar me nxitim dhe nuk ka respektuar ligjin. Sikur përmendëm pak më sipër pronari i saj është Ardian Dulaku. Në të dhënat e QKB tregohet se kjo firmë është një degëzim i kompanisë “INER” e cila ka bashkëpronarë vëllezërit Genc, Ardian dhe Artan Dulaku.
3 vëllezërit Dulaku nuk lanë tender pa fituar nga qeveritë e Rilindjes, edhe pse një kohë të shkurtër patën përplasje me kryebashkiakun Erion Veliaj. Por që prej dy vitesh duket se i kanë rregulluar sërish marrëdhëniet me qeverinë dhe tashmë nuk hasin më pengesa për të marrë paratë e tenderëve. Me këtë tender Beneti i ka siguruar kronikat për “punën e mirë” që do të transmetohen në televizionin kombëtar Vizion Plus, që është pronë e Dulakëve.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post