Autoriteti Rrugor Shqiptar ka akorduar një tender me ofertë fituese 80 milionë lekë bashkimit të operatorëve “Marsi” shpk dhe “Mela” shpk për mirëmbajtje rruge, kompani të cilat nuk disponojnë licencën për të përballuar një kontratë të tillë.
Në garë ka marrë pjesë kompania “Sireta 2F” shpk dhe bashkimi i kompanive “RSM COMPANY”& “EGLAND” ku këto të fundit janë skualifikuar nga tenderi pasi nuk plotësonin kushtet e tenderit. Duhet nënvizuar se këto kompani kishin ofertë më të mirë se kompania fituese ndërsa kompania “Sireta 2F” shpk kishte ofertë më të lartë duke i lënë rrugën e lirë “Marsi” shpk dhe “Mela” shpk.
Nga verifikimet tona për lotin 2 “Mirëmbajtje me performance e segmentit rrugor Ura e Zapodit – Shishtavec” kompanitë “Marsi” shpk në pronësi të Ylber Elezi dhe “Mela” shpk në pronësi të Mehdi Lalës nuk disponojnë licencë NP-4-C për hekurudha, tramvaj, metro, pista aeroportuale. Gjithashtu ato nuk disponojnë licencë NP-12-A për punime inxhinierike mjedisore, licencë NS-6-A për sinjalistikë rrugore jondricuese, licenca NS-7-A për barriera dhe mbrojtja rrugore. Sipas dokumentave të tenderit mosparaqitja në këtë formë është kusht skualifikues duke përjashtuar automatikisht kompanitë “Marsi” shpk dhe “Mela” shpk.
Shkelja flagrante e rregullave të kualifikimit krijon dhe pikëpyetje për mënyrën se si do veprohet me kompanitë pasi kur bashkohen firmoset një marrëveshje bashkëpunimi ku caktohet përfaqësuesi, përqindja e pjesëmarrjes në bashkim, dhe elementët që merr përsipër të realizojë secila prej kompanive të bashkimit. Kompania “Marsi” shpk ka bilanc nëgativ për vitin 2020 pasi ka dalë me humbje me vlerë 12 mlionë lekë sipas QKB-së dhe xhiroja vjetore për 3 vitet e fundit na tregon një kompani e cila nuk kap në asnjë rast xhiron minimale prej 90 milionë lekësh të fondit limit, kusht i vendosur nga Autoriteti Kontraktor te dokumentat standarte.
Për më tepër, kompania “Mela” shpk e cila ka fuqinë financiare për të kryer këtë pjesë, nuk ka licenca sepse nga kërkimet te QKB dhe te Ministria e Infrastrukturës dhe Energjitikës, licenca e vetme që disponon kjo kompani është I.2.A për shërbime ekspertize. Mehdi Lala nën emrin e kompanisë “Albshpresa” shpk dhe “Mela” shpk ka përfituar tendera me vlerë të lartë financiare ku ajo që bie në sy është kontrata stratosferike e lidhur 24 dhjetorin e kaluar me ARRSH-në e Evis Berberit.
Në këtë garë kanë marrë pjesë 7 konkurrentë vetëm ose si bashkim operatorësh por janë skualifikuar duke shpallur automatikisht fituese “AGBES CONSTRUKSION” – “MELA” – “ALB SHPRESA” për vlerën 13,5 milionë euro ose 1.6 miliardë lekë me TVSH. Kjo procedurë publike është shënuar me flamur të kuq nga Open Data Albania pasi paraqet dyshime të forta për korrupsion dhe klientelizëm. Gjithashtu Mehdi Lala me anë të kompanive në emër të tij ka përfituar dhe dy kontrata publike në bashkëpunim me kompani të tjera në lagjen “5 Maj”, vend ku të pothuajse të gjithë OIigarkët pranë qeverisë kanë përfituar nga fatkeqësia e banorëve të cilët janë pa shtëpi dhe pa zgjidhje nga qeveria dhe bashkia Tiranë.
Konkretisht “Mela” shpk, ALB SHPRESA” shpk në bashkëpunim me kompanitë “Alb Tiefbau” shpk – “Egeu Stone” shpk “Infratech” shpk ka përfituar dy kontrata të cilat kapin vlerën 6.6 milionë euro ose 793 milionë lekë me TVSH. Kompanitë e Mehdi Lalës kanë përfituar tendera me skualifikim konkurrentësh në disa raste duke u favorizuar nga institucionet publike dhe rasti i fundit tregon qartë se kjo kompani vazhdon të marri trajtim të diferencuar nga institucioni që është në varësi të ministres së Energjitikës Belinda Balluku.
Discussion about this post