Berisha: Burri i kryebashkiakes socialiste është bos droge!

Kryedemokrati Sali Berisha ka prezantuar pasditen e sotme në Roskovec kandidatin për kryebashkiak të koalicionit opozitar “Bashkë Fitojmë”, Erdit Hazizaj.

Nga sheshi ku renditi arsyet pse qytetarët duhet t’i drejtohen kutive të votimit më 14 maj dhe të votojnë opozitën, Berisha i kërkoi një përballje me debat të hapur para banorëve të Roskovecit, kryebashkiakes së majtë Majlinda Bufi me kandidatin Hazizaj.

Berisha u ndal gjatë te vitet në pushtet të Bufit, duke e akuzuar kryebashkiaken e Roskovecit si trafikante droge dhe bashkëshortin e saj si bosin e krimit në zonë.

“Po dole në debat me Erditin të dalin llogaritë ku fusje pensionet e invalidëve dhe ia mbathje për në Antalia, kurse hallexhinjtë numëronin kafshatat. Nuk del dot. Është droga që të rikandidon ty. Nuk ke vend fare këtu, më mirë mos kandido dhe jep dorëheqjen. Këta ku t’i kapësh njëlloj dalin. Burri i saj bos kryesor i drogës, ajo çonte drogën me pasaportë diplomatike. Sekt si këta nuk ka”, tha Berisha.

Majlinda Bufi, sipas ish-kryeministrit është “simotër me Balluken në Tiranë”, duke iu referuar ministres Belinda Balluku, por edhe me ministren e Jashtme, Olta Xhaçka sa i përket trafikut të drogës.

“Në qendër të përpjekjes sonë do jetë familja dhe shërbimet ndaj saj. Ju e shihni se Edi Rama me ekipin e tij ka marrë lopatat për të mashtruar qytetarët. E dini ju pse hap ato gropa para jush? Ai e di se kandidatët e tij që kanë dalë nga bodrumet e mafias nuk përballen dot me kandidatët tanë. Majlinda, nëse të ka mbetur minimumi i përgjegjësisë ndaj qytetarëve, hajde bëj debat me Erditin në shesh dhe shpjegoja qytetarëve planin për vitet e ardhshme. Aq sa mund të dalin simotrat e tua në Tiranë, Xhaçka apo Ballukja, aq mund të dalësh ti të përballesh me kandidatin që doli nga vota e lirë. Je simotër siameze me Olta Xhaçkën, ti me drogën, ajo me drogën. Të ndjek ai nipi i burrit, që ishte dhe shoferi yt, që shkoje dhe e nxirrje”, u shpreh ai.