Berisha e pranon përpara kryesisë: Kemi bërë punë të dobët për të qartësuar mbështetësit tanë

Partia Demokratike ka mbledhur ditën e sotme Kryesinë e saj, e para mbledhje që pas humbjes në zgjedhjet parlamentare të 11 majit.

Në këtë mbledhje nuk do të marrin pjesë deputetët demokratë që nuk janë rizgjedhur në zgjedhjet e fundit. Vlen të përmendet se i pranishëm është edhe Ervin Salianji, i cili la qelinë në muajin korrik pasi vuajti dënimin me 1 vit burg.

Në fjalën e tij, Berisha tha se Shqipëria po përjeton një diktaturë autokratike. Më tej ai pranoi se PD ka bërë punë të dobët për të qartësuar mbështetësit e saj.

“PD si forca kryesore opozitare u angazhua në një përpjekje intensive serioze ndërkombëtare për paraqitjen e gjendjes së rëndë, për denoncimin e diktaturës autokratike të Edi Ramës në të gjitha organizatat ndërkombëtare ku ne jemi të federuar apo të anëtarësuar. E theksoj këtë moment si një moment të një rëndësie kapitale, sepse për fat të keq, e them këtu, për shkaqe më shumë njohje, nuk është gjerësisht e realizuar se Shqipëria përjeton një diktaturë autokratike. Kjo sigurisht më shqetëson në opinionin publik, por më tepër më shqetëson në anëtarësinë dhe mbështetësit tanë. Kjo nuk vjen nga mosdashja e tyre, kjo ka disa faktorë, por një nga këta faktorë është puna e dobët e jona për të qartësuar anëtarësinë dhe mbështetësit tanë në këto koncepte fondamentale politike.
Diktaturat totalitare, ata që e përjetuan, ata thonë se kjo e sotmja nuk është e tillë. Dhe kanë të drejtë sepse diktaturat totalitare e përjashtojnë pluralizmin, diktatura autoritare nuk e përjashton pluralizmin, por e shtyp pluralizmin. Kjo e dyta e shtyp pluralizmin dhe është mizore në përqendrimin e të gjithë pushteteve në një dorë”.

Berisha vijoi me akuza, kur tha se “punonjësit e shtetit i emëron partia shtet”.

“Të nderuar zonja dhe zotërinj dhe të dashur qytetarë që nga ndiqni, nga 220 mijë rrogëtarë të këtij shteti, nga presidenti i republikës te punonjësi më i thjeshtë, vetëm 2 mijë prej tyre nuk janë emëruar apo zgjedhur nga partia shtet. 218 mijë në një përqendrim pra pothuaj total, i përkasin partisë shtet, partisë së krimit.
Nuk ka përqendrim më të lartë pushteti në një diktature autokratike se sa ky”.

Pas fjalës së Berishës pritet që mbledhja e kryesisë të vazhdojë me dyer të mbyllura.