Polonia kërkon aktivizimin e Nenit 4 të Traktatit të NATO-s

Kryeministri polak, Donald Tusk tha sot se ushtria polake kishte regjistruar 19 shkelje me dronë rusë në hapësirën ajrore të vendit gjatë natës.

Duke folur para parlamentit polak, Tusk tha se tre ose ndoshta katër dronë, ishin rrëzuar nga avionët polakë dhe të NATO-s – që u ngritën në ajër për t’u përballur me kërcënimin.

Kryeministri polak tha se një numër i konsiderueshëm dronësh kishin fluturuar në vend nga Bjellorusia.

“Droni i fundit që u rrëzua ishte në 06:45 sipas orës lokale”, tha ai.

“Nuk ka dyshim se ky provokim është më i rrezikshëm, nga pikëpamja e Polonisë, sesa ato të mëparshmet”, tha kryeministri polak Donald Tusk, duke folur para deputetëve në parlament.

Tusk tha se Polonia kishte kërkuar aktivizimin e Nenit 4 të Traktatit të NATO-s.

“Konsultimet aleate tani kanë marrë formën e një kërkese zyrtare për të aktivizuar Nenin 4 të Traktatit të Atlantikut të Veriut”, tha Tusk.

“Vendimi për të aktivizuar Nenin 4 u parapri nga konsultimet e mia me presidentin Karol Tadeusz Nawrocki. Ky është rekomandimi dhe vendimi ynë i përbashkët”, shtoi ai.

Neni 4 i NATO-s përcakton që palët në aleancë do të konsultohen së bashku sa herë që, sipas mendimit të ndonjërës prej tyre, kërcënohet integriteti territorial, pavarësia politike ose siguria e ndonjërës prej Palëve.