“Berisha është buf kënete”, Malltezi ‘i përvishet’ Ramës: Minjtë dhe hajdutët e kanë frikë!

Dhëndri i ish-kryeministrit Sali Berisha ka reaguar pasi shefi i qeverisë, Edi Rama e krahasoi sot kryedemokratin me një buf kënete.

Përmes një postimi në rrjetet sociale, Jamarbër Malltezi, është shprehur se minjtë e urrejnë bufin, duke cilësuar kështu anëtarët e qeverisë së Ramës si të tillë.

Ai shkruan më tej se bufi siguron që popullata e hajdutëve të zvogëlohet dhe të mos dalë jashtë kontrollit.

Duke bërë këtë krahasim, Malltezi thotë se vjedhjet e qeverisë në Shqipëri kanë dalë jashtë kontrollit, pasi sipas tij, janë vjedhur 430 milionë euro për incenerator që nuk ekziston, 140 milionë euro për check-up inekzistent, etj.

“Minjtë e urrejnë bufin. Bufi është një specie shumë e rëndësishme ekologjike dhe me status mbrojtje të vecante duke qenë keystone species dhe bioindikator për habitat të shëndetshem. Quhet specie gurthemeli se Bufi siguron që popullata e hajdutëve të zvogëlohet e mos dalë jashtë kontrollit. Nëse do hiqej bufi nga ekosisti atëhere do gëlonin minjtë dhe plackitësit e pasuriëe, sic ndodhi me 430 miljon € për inceneratorë që nuk ekzistojne, 140 miljon € për check-up inekzistent, 90 miljon € duke rritur 80-fish cmimin per sterilizime, etj”, shkruan Malltezi.

Krahasimi që Rama i bëri ditën e sotmë Berishës erdhi pasi kryedemokrati paralajmëroi kryeministrin që të mos guxojë të protestojë para institucioneve të drejtësisë së re.

Duke e cilësuar prej ditësh kreun e Partisë Demokratike si buf të kënetës, Rama në një postim në Facebook, e konsideroi atë një rrezik dhe armik ndaj diversitetit, që shuan urinë me zvarranikët dhe amfibët.

“Bufi i kënetës është një plaçkitës folesh, i cili konsiderohet një rrezik edhe për shpendët shtëpiakë. Ai jeton mes zvarranikëve dhe amfibëve, me të cilët shuan edhe urinë. Trupi i tij grumbullon pesticidet dhe helmet kundër brejtësve, çka e bën helmues atë vetë. Konsiderohet edhe një specie shumë armiqësore ndaj diversitetit”, shkroi Rama në një postim në Facebook.

Që nga arrestimi dhe dhënia e masës së sigurisë ndaj kryebashkiakut Erion Veliaj, Rama dhe Berisha kanë replikuar shpesh me akuza dhe kundër akuza ndaj njëri-tjetrit