Firmat e hedhura për Kuvendin e 11 Dhjetorit, ku Sali Berisha kërkon rikthimin në krye të PD, rezulton se janë me probleme. Nga një verifikim i thjeshtë që Agron Shehaj bëri për formularët e mbledhur në degët 5 dhe 7 në Tiranë, i cili sipas deputetit ishte një test, rezultoi se dy delegatë nuk kanë hedhur firma dhe që është falsifikuar firma e tyre.
Por mbajtja e fshehtë e dy rasteve të falsifikimit të formularëve nga ana e Shehajt hedh dyshime se ai po mban anën e Berishës edhe për faktin se kandidoi kundër Bashës, por humbi si kryetar PD, ndërsa ai e justifikoi me faktin se “kam deklaruar se 98% janë të sakta dhe jo 100%”. U desh ndërhyrja e dy delegatëve Freskida Rapo dhe Bujar Kula për të kuptuar se formularët janë të parregullt. Pavarësisht përqindjes së parregullsisë, kjo i dha të drejtë Partisë Demokratike, e cila kërkoi që të dorëzohen formularët në protokoll, me qëllim verifikimin e tyre, për më tepër që kjo parregullsi ka ndodhur në mes të Tiranës, duke ngritur me vetëdije pyetjen “Imagjino se çfarë është bërë në qytetet e tjera?”.
Gjithsesi, sikur të mos kishte ndodhur asgjë, zëri zyrtar i Berishës, Floriana Garo, deklaroi se “vetëm 2 nga 100 delegatët e verifikuar nuk kanë konfirmuar firmosjen e formularit. Garantojmë se formularët me emrat e tyre janë tërhequr nga grupi i 4700 formularëve të depozituar e ndërkohë që po bëjmë një proces riverifikimi të hapave për administrimin e tyre”.
Por le të ndalemi këtu.
Së pari, mjafton vetëm një rast për të rrëzuar poshtë një proces, për të cilin pretendohet se është 100% i rregullt, siç janë shprehur mbështetësit e Berishës dhe që gjoja i ruajnë në kasafortë, duke mos lënë personat përgjegjës për verifikimin e tyre. Pra, ata kërkojnë mbledhjen e Kuvendit më 11 dhjetor, me firma që nuk janë të rregullta. Dakord se numri i firmave të parregullta mund të jetë i vogël sa nuk sjell ndryshim në rezultat, por kjo nuk është e vërtetuar. Ndërsa parregullsia u vërtetua me një test të thjeshtë siç deklaron Shehaj.
Së dyti, Sali Berisha nëpërmjet Floriana Garos, deklaron se këta dy delegatë nuk kanë konfirmuar firmosjen e formularit. E vërteta qëndron se këta dy delegatë kanë deklaruar se është falsifikuar firma e tyre, jo se nuk e kanë konfirmuar. Këtë sa veta e kanë konfirmuar, e sa jo, ende nuk e dimë, këta të dy kanë deklaruar se u është falsifikuar firma. Pra, falsifikimi i firmës apo formularit, sipas Kodit Penal në Shqipëri është një vepër penale dhe për këtë duhet të mbahet përgjegjësi penale.
Së treti, Garo deklaron se formularët me emrat e tyre janë hequr nga grupi i 4700 formularëve. Por duhet të theksojmë se heqja e tyre nga grupi është për të mbrojtur mbështetësit e Berishës dhe jo për të zbardhur të vërtetën. Nëse Berisha pretendon se i ka 4700 firma delegatësh dhe që dy nuk e kanë konfirmuar, atëherë, formularët e parregullt duhet t’i dorëzojë në prokurori për të kuptuar është firma e këtyre të dyve që deklarojnë se është falsifikuar, apo e vërteta është se është hedhur firmë false. Por mungesa e transparencës dhe zhdukja e formularëve është bërë pikërisht për të minuar transparencën dhe nga frika se vërtetimi i firmave false në fakt minon gjithë procesin e nisur nga Berisha, i cili dita ditës po tregon atë që PD deklaroi që në fillim se duhet verifikuar nga personat përgjegjës. Për hir të vërtetës, kjo histori e zhdukjes së formularëve fals na kujton zhdukjen e pamjeve të kamerave të sigurisë me 21 janar, zhdukjen e të dhënave të serverëve të tatimeve, por për Berishën nuk kanë rëndësi, rëndësi ka që firmat t’i mbledhë vetë, t’i verifikojë vetë dhe kryetar të zgjidhet vetë! / Gijotina.com
Discussion about this post