Kreu i Partisë Demokratike, Sali Berisha nga dega numër 4 në Tiranë, u shpreh i bindur se PD është në një epërsi të madhe në krahasim me kundërshtarin e tyre, Partinë Socialiste.
Gjatë fjalës së tij, Berisha tha se PD ka një mbështetje të fuqishme dhe një entuziazëm të pa parë më parë.
Ndër të tjera ai theksoi se PD ka një program i cili në të vërtetë çdo ditë po pushton mendjen dhe zemrat e qindra shqiptarëve dhe që si qëllim kryesor ka një mundësi të re për çdo shqiptar.
Pjesë nga fjala
Ne kemi një epërsi të madhe ndaj kundërshtarit tonë, kemi një mbështetje të fuqishme, entuziazëm të paparë më parë, një program i cili në të vërtetë çdo orë e ditë, po pushton mendjen dhe zemrat e qindra shqiptarëve.
Ky program, ka si qëllim kryesor një mundësi të re për çdo shqiptar, nga fëmijët për një shkollë më të mirë, te pensionistët për një jetë më të mirë. Tek të rinjtë për shanse shkollimi dhe punësimi reale, te bizneset për shanse suksesi, tek punonjësit për vlerësim dhe respekt të punës së tyre. Ka para së gjithash rikthimin e parave te qytetarët.
Ne në 100 ditët e para, do të realizojmë atë ndryshim të cilin nuk e ka menduar asnjë njeri këtu, do vendosim minimumin jetik 200 euro për çdo pensionit, çdo qytetar në ndihmë ekonomike, të papunë, jetim, student me bursë.
Shqipëria do të adoptojë listën e ilaçeve të Italisë. Dy shërbime thelb për çdo komb, arsimi dhe shëndetësia kanë degraduar në mënyrën më të papranueshme. Janë rrokulisur deri në shpartallim. Sistemi i shëndetësisë është jashtëzakonisht problematik, ku të sëmurët rëndë në spitale i merr sëmundja se nuk kanë ilaçe për mjekim.
Një sistem ku një i sëmurë duhet të presë muaj të tërë për të bërë skanerin. Një sistem ku mjekimi është gjysmak ose ai që nuk duhet. Ju keni ndjekur dramën e tmerrshme që zhvillohet në spitalin onkologjik. Në asnjë vend nuk ndodh ajo.
Tre muaj më parë, Rama deklaroi se atje po ndodhin krime kundër njerëzimit. Po, është krim kur të sëmurin e mban dhe nuk i jep ilaçe që luftojnë sëmundjen. Por, Rama nga ajo ditë deri më sot nuk mori asnjë masë të vetme, sepse ai është autori i atij krimi.
Ne do të dyfishojmë buxhetin për shëndetësinë dhe garantoj çdo shqiptar se nuk do të shitet kurrë ilaç cilësie tjetër se në ato që shiten në të paktën dy vende të BE. Kurrë nuk do të mungojnë ilaçet jetike. Do të dyfishohet rrogat e mjekëve dhe infermierëve.
Edhe shkolla është zhytur në kaos, mësuesit janë të diskriminuar nga portali ‘një mësues për partinë’. Ne zotohemi para jush që mësuesit t’i vendosim në piedestal. Nuk do të ketë rrogë minimale nën 1500 euro.
Discussion about this post