Kryedemokrati Sali Berisha u shpreh këtë të enjte se lap-topi i Engjëll Agaçit, Sekretari i përgjithshëm i kryeministrisë, “është sekuestruar nga prokuroria”. Në një fjalim të mbajtur nga foltorja e Kuvendit, Berisha paralajmëroi se të dhënat në pajisjen elektronike do të zbulojnë afera të kryeministrit Edi Rama dhe “grupit të tij”.
Teksa konstatoi mungesën e kryeqeveritarit në seancën plenare, Berisha u shpreh: “Dy arsye madhore janë që nuk vjen dot. Së pari, ku është Sekretari juaj i Përgjithshëm i kryeministrisë? Ku është Agaçio që dhuron edhe 30 hektarë? Ku e keni? A keni përgjegjësi para qytetarëve shqiptarë kur Sekretari i Përgjithshëm ia mbath dhe i mashtroni e thoni se është në spital? Madje një ditë kur unë thashë se është arratisur, përhapni thashethemin se është në intubim. Të gjithë ju këtë rrugë do ndiqni? Arratinë do ndiqni? Tani, e dyta, laptopi është në prokurori. Ta dini mirë. Jeni të pashpresë. Laptopi është në prokurori”.
“Prandaj thirreni më mirë të vijë se sa t’u nxjerrë laptopi një nga një ju. Laptopi ka të gjitha vjedhjet e tmerrshme që ka bërë Edi Rama me grupin e tij”, shtoi ai.
Sipas Berishës, problemi i dytë i madh i “dezekulibrimit” të Ramës, është dosja McGonigal.
“Ajo po shpërthen. A e kuptoni ju që keni në krye një njeri që korruptoi shefin e kryeinteligjencës së SHBA? Dhe një nga ata që bëri gjahun e shtrigave ndaj presidentit Donald Trump. Çfarë mendoni ju se do mbyllet ajo siç u mbyll? Jo, absolutisht ajo dosje nuk mbyllet”, tha Berisha.
Kreu i PD përmendi edhe raportimet mediatike për shpërndarjen e fondeve të USAID në Shqipëri, duke u shprehur se “janë 10 milionë dollarë dhe ajo është vetëm maja e ajsbergut, që janë dhënë për reformën në drejtësi Delina Ficos”.
“Se sa ka marrë Linda Rama nga paratë e taksapaguesve, nuk e di njeri, por edhe ajo do dalë. Prandaj të sillet ligji i desorofikimit të vendit këtu. Të presim me gërshërët e ligjit çdo lidhje me monstrën e njerëzimit, Xhorxh Soros dhe paratë e tij toksike. Pse do mbani të gjithë ju këtë barrë të rëndë, kur një pjesë nuk keni lidhje me Sorosin? Pse do mbani mëkatet e tmerrshme të Edi Ramës? Pse do mbani ju aktakuzat e rënda të laptopit të Engjëll Agaçit? Pse do mbani ju marrëdhënien kriminale të tij me McGonigalin? Është koha, secili prej jush të zgjohet”, iu drejtua Berisha-socialistëve.
Discussion about this post