Ish-kryeministri Sali Berisha ka deklaruar se ekonomia shqiptare është thellësisht e dëmtuar nga paratë e drogës, të cilat, sipas tij, kanë mbushur sektorin e ndërtimit dhe kanë ndikuar negativisht në prodhimin industrial dhe eksportet.
“Narkoeuro është një dramë e tmerrshme për ne. Ka vrarë me mijëra vende pune,” u shpreh Berisha në një deklaratë publike, duke theksuar se eksportet nga Shqipëria janë ulur me 32% nga viti 2023 në 2024.
Ai shtoi se për tre vite radhazi prodhimi industrial është në rënie dhe akuzoi paratë e drogës për deformimin e strukturës së ekonomisë: “80% e parave që ushqejnë ekonominë vijnë nga droga, e vërtetuar kjo. Ato investohen në beton dhe ndërtim, por kjo para toksike mjeron shumicën e popullatës”.
Berisha kritikoi politikat aktuale që, sipas tij, kanë penalizuar sektorin e eksporteve dhe të industrisë fason. Ai përmendi një rast konkret të një uzine elektronike moderne që është lënë në hije, ndërsa ndërtimit i është dhënë prioritet përmes rritjes së kërkesës për leje dhe fitimeve të lidhura me kapitalin e paligjshëm.
“Fasonëve u tha se janë për botën e tretë. Si mund të jetë kështu kur ata kanë uzina moderne dhe punë të mirëpaguar?” shtoi ai. Ai gjithashtu kritikoi rritjen e taksës së ndërtimit, duke paralajmëruar se kjo barrë do të përfundojë mbi qytetarët.
Në përmbyllje, Berisha u zotua se me një qeverisje të tij, financat nga droga do të ndërpriten në mënyrë drastike: “Me dorë të hekurt do i presim paratë e drogës. Kur e kam bërë këtë më parë, rritja ekonomike shkoi në 7 dhe 8%. Kjo do të ndodhë përsëri.”
Discussion about this post