Partia Demokratike ka thirrur ditën e sotme protestën e radhës në kuadër të asaj që ajo e quan “mosbindje civile”. Protesta është planifikuar që të nisë në orën 17:00, ku ashtu si edhe në protestën e kaluar pritet të bllokohen për rreth 3 orë disa prej akseve kryesore rrugore në Tiranë.
Në tubimin e sotëm pritet të marrë pjesë dhe kreu i PD-së, Sali Berisha, prezenca e tij e parë në një protestë që pas lirimit nga masa e “arrestit shtëpiak”.
Demokratët kanë deklaruar se nuk do të tërhiqen nga protestat deri në plotësimin e kërkesës së tyre për Qeveri teknike para zgjedhjeve parlamentare të 11 Majit 2025.
Rrugët që pritet të bllokohen sot nga demokratët janë aksi pranë Bashkisë së Tiranës, rreth-rrotullimi tek “Zogu i Zi”, tek sheshi “Uillson”, tek “Pallati me Shigjeta”, si dhe kryqëzimi tek “Rruga e Elbasanit”, pranë xhamisë së “Namazgjasë”.
Gjithsesi, Policia e Tiranës e ka refuzuar lejen e kërkuar nga demokratët për bllokimin për 3 orë të akseve kryesore në kryeqytet. Autoritetet pretendojnë se bllokimi i rrugëve është vepër penale dhe se organizatorët do të mbajnë përgjegjësi.
Nisur nga kjo situatë, ashtu si edhe në protestat e kaluara, pritet të ketë përplasje mes protestuesve dhe efektivëve të Policisë së Shtetit.
Discussion about this post