Pak minuta më parë Komisioni i Rithemelimit ka deklaruar se të dilelën do të mbahen zgjedhjet për kryetar të degës PD Kukës. Nuk ka vonuar shumë dhe ka ardhur reagimi i Partisë Demokratike zyrtare. Përmes një deklarate publike thuhet se PD kundërshton çdo përpjeke të Komisionit të Rithemelimit, pasi nuk janë ligjore. Në deklaratë thuhet se ky proces është përjashtues pasi në listë nuk janë përfshirë kandidatë, të cilët kanë kontribuar në Partinë Demokratike.
“Partia Demokratike, Dega Kukës kundërshton përpjekjet që po bëhen për një proces në dukje zgjedhor nga persona të vetëdeklaruar si Komisioni i Rithemelimit në Kukës . Ky proces nuk ka asgjë të përbashkët me zgjedhjet, reformimin apo organizimin e Partisë Demokratike Dega Kukës dhe aq më pak ka të bëjë me votën e lirë. Ky proces, në tërësinë e tij po bazohet mbi emërime të individëve në krye të seksioneve apo grupseksioneve, të cilët nuk kanë dakordësinë e anëtarësisë.
“Procesi zgjedhor” i anonçuar për zgjedhjen e drejtuesve te strukturave në të gjitha nivelet e Degës, përtej propagandës, rezulton një proces përjashtues sepse nuk ka përfshirë anëtarë të cilët kanë kontribuar, demokratë që kanë sakrifikuar ndër vite dhe punuar për Partinë Demokratike edhe pse të pa vlerësuar për sakrificat dhe kontributet e tyre, duke besuar në vlerat e saj. Strukturat drejtuese të Degës së PD-se Kukës, kanë qenë në nivelin sipëror të organizimit dhe funksionimit deri në momentet kur hyri fryma përçarëse e rithemelimit”, thuhet në njoftim.
Ndër të tjera në deklaratë thuhet se, përpjekjet për të vazhduar në një proces të njëanshëm, nuk shprehin vullnetin dhe qëllimin për bashkim të demokratëve dhe të Partisë Demokratike, por dëmtimin dhe përçarjen e saj të pashmangshme.
Discussion about this post