Në një konferencë për mediat, Kreu i Partisë Demokratike, Sali Berisha, komentoi lajmin e fundit lidhur me qëndrimin e Departamentit Amerikan të Shtetit (DASH) ndaj tij, duke e cilësuar atë si një zhvillim me rëndësi rajonale dhe botërore. Berisha ia atribuoi këtë qëndrim Sekretarit të Shtetit Amerikan, të cilin ai e identifikoi si Marco Rubio.
Kryedemokrati tha se “DASH i SHBA-së i drejtuar nga sekretari i Shtetit, Marco Rubio, shpreh qëndrimin e tij në përgjigjen e dhënë një gazetari të njohur, se ai nuk përkrah dhe nuk mbështet vendimet politike, apo qëndrimet politizuese të administratës së Biden, në këtë rast për Sali Berishën.”
Kreu i opozitës deklaroi se me këtë akt, DASH “jep përgjigjen më të fuqishme atyre përpjekjeve që u bënë për një Shqipëri pa opozitë nga Edi Rama në mendësinë e etërve të tij, Xhorxh Soros dhe Antoni Blinken.” Ai e cilësoi këtë si një vendim “të një rëndësie të madhe, shkëputjes dhe mospranimit të vendimeve politizues” dhe akuzoi se “përpjekjet e administratës së mëparshme që për shkak të lobimit korruptiv të Edi Ramës dhe Sorosit, të ndëshkonin opozitën konservatore, përfunduan njëlloj si ai firmosi, aty ku e kanë vendin.”
Në fjalën e tij, Berisha falënderoi DASH, “sekretarin Rubio, administratën e re dhe presidentin Trump për këto qëndrime jashtëzakonisht të rëndësishme, kundër vendimeve të ekstremit të majtë, kundër vendimeve të forcave antidemokratike, të majta në Shqipëri dhe kudo në botë.”
Më tej, ai e përshkroi këtë zhvillim si “një shpërblim i madh për të gjithë ata demokratë e demokrate që në kushtet më të pazakonta qëndruan për kauzën e drejtë, qëndruan për të vërtetën, e cila vonon, por nuk harron.”
Në përfundim, Sali Berisha theksoi se ky vendim “nxjerr edhe njëherë para shqiptarëve dhe botës, fytyrën e shëmtuar të atyre që morën përsipër një akt të tillë, që vendimet politike të godisnin opozitën konservatore në Shqipëri.”
I pyetur “kur do të udhëtoni drejt SHBA”, ai u përgjigj: Unë vendimin e mora vesh mbrëmë, në të njëjtën kohë që e morët vesh dhe ju. Nuk kisha ndonjë plan për udhëtim dhe natyrisht nuk mund të them se do të udhëtojë këto 2-3 ditë sepse janë ditët e kulmit të fushatës. Sigurisht në një kohë më të përshtatshme do kisha shkuar, por ky vendim nuk humbet vlerë, është një vendim jashtëzakonisht i çmuar.
Më tej, duke iu përgjigjur onteresit të medias, shtoi se “non grata është konsideruar vendim politik, është dënuar, ky është dënim i atij vendimi. Se është tjetër kur shqyrtohet dhe kjo apo ai qëndrim, por është shpallur; vendime të politizuara të administratës Biden, është paekuivok. Pra është e pashpresë”.
I pyetur nëse ka kërkuar ndonjëherë viz, ai sqaroi: Unë të kërkoj vizë? Jo nuk kam kërkuar vizë. Unë nuk kam kërkuar vizë, pasi kam lënë detyrën e kryeministrit, në mos gabohem, asnjëherë”.
Lexo edhe:
Shtetet e Bashkuara zhbëjnë ‘non gratën’, Berisha rifiton hyrjen në Amerikë
Discussion about this post