Ish-kryeministri Sali Berisha deklaroi gjatë një takimi me qytetarë në Shijak se shëndetësia në Shqipëri është shkatërruar dhe si rrjedhojë e kësaj renditemi ndër vendet me numrin më të lartë të vdekjeve nga Covidi.
Berisha shtoi se Tirana renditet në dhjetë pozicionet më të ulëta për sistemin shëndetësor nga 2053 qytete të listuara.
Ai theksoi se politika e kryeministrit Rama që të bllokoheshin shtrimet në spitale për Covidin, ka bërë që të rritet numri i vdekjeve nga ky infeksion.
“Ka nevojë për një ndërhyrje emergjente, ka nevojë për një mobilizim të madh për të shpëtuar Shqipërinë dhe Shijakun nga ky regjim që funksionon si një makineri mafioze, mashtrimi, si një makineri gjigande vjedhjeve dhe rrënimi të qytetarëve.
Krahas varfërisë, shoqëria shqiptare vuan dhe nga probleme si arsimi dhe shëndetësia. Le të ndalemi te shëndetësia dhe te Tirana.
Këto kohë Tirana rezulton në 10 pozicionet më të ulëta për sistemin shëndetësor. Një klasifikim ky i mbi 2053 qyteteve në planet.
Për shkak të kësaj shëndetësie të shkatërruar ne humbën nga Covidi më shumë burra dhe gra se çdo vend në Evropë. E diktuar kjo nga një politikë çnjerëzore e atij njeriu që është sot në pushtet. Ajo politikë qe një përqendrim çnjerëzor i shtrimeve, një bllokim i shtrimeve në spitale, një kufizim i shtretërve. Kosova me 2 milionë banorë vendosi në dispozicion të Covidit 1300 shtretër dhe Shqipëria me 3 milionë banorë vendosi 630 shtretër”, tha Berisha.
Discussion about this post