Nga ‘Foltorja’ në Kamëz, ish-kryeministri Sali Berisha, ka shtuar sulmet ndaj Xhorxh Soros, duke e quajtur atë armik të Shqipërisë dhe të Republikanëve në SHBA. Sipas Berishës, Soros nuk përfaqëson Amerikën, por ai është një armik i egër i aleatëve tanë të vërtetë, republikanëve amerikan. Berisha tha se PD do të ngrihet më e fuqishme dhe nuk do të lejojë këtë gjë.
“Mafja më e rrezikshme e planetit e kryesuar nga multimiliardieri Xhorxh Soros u vërsul me tërbim ndaj të djathtës shqiptare. Xhorxh Soros nuk është Amerika, ai është një armik i egër i aleatëve tanë të vërtetë, republikanëve amerikanë. Ai me bilionat e tij punon ditë e natë për të shkatërruar vlerat e konservatorizmit në vendin e tij ku të njëjtën gjë bëri dhe në Shqipëri. Por ne jemi këtu për tu zotuar se në Shqipëri do ngrihet një forcë konservatore, PD më e fuqishme se kurrë në 30 vite”, deklaroi ai.
Ndërsa tha se Rama dhe qeveria e tij janë po aq kriminelë sa Soros, përderisa bashkëpunojnë me të për të pasuruar vetën dhe vjedhur qytetarët.
