Organizata AIS, ose siç njihet ndryshe si Open Data Albania ka depozituar në Gjykatën Kushtetuese një kërkesë për shfuqizim të pjesshëm të aktit normativ numër 9, datë 16.12.2019, “për përballimin e pasojave të fatkeqësisë natyrore”, miratuar nga Kuvendi i Shqipërisë në datën 18.12.2019.
Konkretisht kërkohet shfuqizimi i kreut 6, që ka të bëjë me procedurat e prokurimit publik, nenet 40-44, dhe neni 4, pika 7 dhe pika 9.
Sipas AIS, ky akt normativ që ka fuqinë e ligjit, në pjesën për prokurimet për përballimin e pasojave të fatkeqësisë natyrore pas tërmetit të 26 nëntorit 2019, cenon një të drejtë kushtetuese që është ajo e lirisë së veprimtarisë ekonomike, e cila është parashikuar në nenin 11 të Kushtetutës.
Kështu, duke cenuar lirinë për veprimtari ekonomike, krijohen hapësira për pabarazi, klientelizëm, kontraktim preferencial, favorizim dhe veprime korrupsioni në dëm të fondeve publike.
Në kërkesë padinë e AIS, thuhet se ky akt normativ ka vendosur me ligj llojin e procedurës, afatet për pjesëmarrje, afatet për ankimim dhe vlerësim, duke anashkaluar legjislacionin kombëtar për prokurimet publike dhe duke kufizuar të drejtën për garë dhe barazi.
AIS e paraqet kërkesën për pezullimin dhe shfuqizim të aktit normativ me fuqi ligji, pjesa për prokurimet për shkak se sjell pasoja që prekin interesa shtetërore, shoqërore ose të individëve.
Gijotina.com
