Kryetari i Partisë Demokratike Sali Berisha, në fjalën e tij në tubimin në mbështetje të tij, u shpreh se Tirana është bërë qyteti i ndaluar për të rinjtë e Shqipërisë. “Sot i riu dhe e reja shqiptare janë për fatin më të keq të kombit tonë, njerëzit më të përçmuar dhe më të nënvlerësuar”, tha kryedemokrati gjatë fjalës së tij.
Kryedemokrati deklaroi se, PD e ka në programin e saj, si objektivin më madh, pikërisht mbështetjen e të rinjve shqiptarë, që ata të mos e lënë vendin.
Lideri i opozitës ka ftuar të rinjtë dhe të rejat në protestën e ditës së martë tek bashkia e Tiranës.
“Erion Veliaj, tik-taku i orës po shënon fundin tënd. Fundin më të turpshëm të një zyrtari në të gjithë historinë e kontinentit. Erion, e nise karrierën si 99-sh dhe si 99-sh do përfundosh. Në shtyllën e turpit, në sheshin Skënderbej do varesh në shtyllën e turpit, me germa të zeza do gdhendet emri yt. O qenie pa shpirt, pa moral, pa karakter, pa nder, pa dinjitet. Largohu, mos e prit popullin se zemërimi i tij do të të mjerojë. Edhe njëherë u përshëndes, ftoj të gjithë qytetarët ditën e martë në ora 11.00. Tek bashkia na pret fitorja, na pret beteja, na pret e ardhmja“, tha ai.
Kryetari i Partisë Demokratike u shpreh se qeveria teknike dhe vota e diasporës janë kushtet vendimtare për zgjedhje të lira. Për këtë, Berisha mori si shembull Maqedoninë e Veriut, ku pas protestave, tani rotacioni i pushtetit është diçka normale.
Kreu i PD është shprehur se “kjo betejë e idealeve, e shpresës dhe të ardhmes, është betejë për çdo shqiptar kudo që ndodhet, nga Afrika e Jugut në Polin e Veriut”.
Discussion about this post