Kryedemokrati Sali Berisha, prezantoi sot, gjatë një konference për mediat, vizionin e tij për një Shqipëri të transformuar energjetikisht. Ai theksoi se Shqipëria do të bëhet një superfuqi energjetike, duke shfrytëzuar burimet e pasura natyrore të vendit.
Sipas Berishës, prioritet do të jetë prodhimi i energjisë rinovueshme nga era, dielli dhe gazi, dhe parqet eolike dhe solare do të kenë një rol të rëndësishëm në këtë proces.
Lideri i opozitës garantoi se gjatë mandatit të parë, prodhimi energjetik i Shqipërisë do të dyfishohet, përfshirë përdorimin e burimeve ujore në përputhje me standardet mjedisore.
Ai gjithashtu tha se qytetarët dhe bizneset shqiptare do të jenë përfituesit më të mëdhenj të këtij bum i energjetik. Berisha po ashtu deklaroi se Shqipëria do të shndërrohet në një destinacion tërheqës për investime energjetike në Europë.
“Shqipëria Madhështore do të jetë Shqipëria e bumit të madh energjetik.
Do të jetë Shqipëria e investimeve madhështore në energjetikë.
Unë jam këtu për të garantuar qytetarët shqiptarë se prodhimi i energjisë nga era, dielli dhe gazi, me përparësi prodhimin e energjisë së rinovueshme, do të dyfishojë prodhimin total të sotëm gjatë mandatit që vjen.
Parqet eolike, parqet solare do të marrin një përparësi absolute. Shqipëria ka ndër platformat e erës më të fuqishme në Europë. Këto platforma shtrihen nga thellësitë e Alpeve në jugun e vendit.
Zona të mëdha mund të prodhojnë me mijëra megavatë në energji eolike.
Por dielli është një burim i pashterrshëm dhe unë garantoj qytetarët shqiptarë që Shqipërinë do ta shndërrojmë në vendin më tërheqës në Europë për investimet në fushën e energjisë.
Dhe përfituesit më të mëdhenj të këtij bumi në prodhimin energjetik do të jenë qytetarët shqiptarë, do të jetë biznesi shqiptar, do të jetë Made in Albania, prodhimi shqiptar.
Do të përdoren të gjitha potencialet ujore, në përputhje ne rregullat rigoroze të mjedisit, për të shndërruar në energji ujërat që derdhen të fjetura në det.
Do autorizohet ndërtimi i mikrohidrocentraleve për të prodhuar nga fshatra, nga komunitete, nga lagje, energji falas për veten e tyre.
Këto burime fantastike, këto burime të mëdha, të pashtershme energjie do ta bëjnë Shqipërinë një ndër nyjet më të fuqishme energjetike, një superfuqi rajonale energjetike.
Gazifikimi i qyteteve të vendit do jetë nisma ndër më kryesoret e qeverisë shqiptare.
Buxhetet e ardhshme do i përkushtohen infrastrukturës dhe gazifikimit të Shqipërisë.
Është mëkat, është e pafalshme të kesh në territorin tënd, në mbi 200 kilometra trajektore, një nga gazsjellësit më të fuqishëm të kontinentit, të kesh qenë kontribut kryesor në fitoren e këtij projekti, dhe tani të pretendosh të marrësh gazin e lëngët, të mos shfrytëzosh potencialin e jashtëzakonshëm të tij.
Pra, të gjitha këto marrin fund”, u shpreh ai.
Discussion about this post