Të shtunën në mesditë, ish-kryetari i Partisë Demokratike në degën e Kukësit, Ibsen Elezi, ka depozituar pranë protokollit formularin e kandidimit dhe CV-në e tij.
“Kam dorëzuar kandidaturën për postin e kryetarit të Partisë Demokratike. Më kanë kërkuar një formular vetëdeklarimi, të cilin ua kam dërguar me email. Kam mbështetur një kandidaturë të Edvin Kullurit për kryetar, por vendosa të garoj vetë”, ka deklaruar Elezi.
Kujtojmë se Elezi plotësoi dokumentet për të kandiduar për kryetar të PD-së në 13 qershor të 2021 kudnra Bashës por u skualifikua me argumentin se po dëmtonte interesat politike të Partisë Demokratike.
Midis arsyeve theksohej se Elezi nuk kishte bërë fushatë për PD-në në zgjedhjet e 25 prillit dhe nuk ka qenë i angazhuar për fitoren e opozitës, duke sjellë eliminimin nga gara për kryesinë e partisë.
Në zgjedhjet e 13 qershorit, kandidatët ishin: Lulzim Basha (që rezultoi fitues), Edit Harxhi, Fatbardh Kadilli dhe Agron Shehaj. Deri më sot, kandidati i vetëm për zgjedhjet e 22 majit, ishte ish-Kryeministri Sali Berisha. Pritej që në këto zgjedhje të merrnin pjesë edhe Fatbardh Kadilli e Ervin Kulluri, por të dy u tërhoqën nga gara.
“Nuk do të hyj në garë, sepse partia nuk është e bashkuar. Shumë anëtarë nuk janë përfshirë në proces. Përderisa rezultati është e qartë; ajo është parti e njerëzve që janë rreshtuar pranë Berishës. Në këtë rreshtore, s’ka vend për dilema. Atyre nuk mund t’u bësh pyetjen je apo nuk je me Berishën? Nxitimi që u përdor nga Basha, u përdor edhe nga Berisha”, tha Kadilli.
Ndërkohë lideri historik i Partisë Demokratike deklaroi se nëse në zgjedhjet e 22 majit nuk do të kishte kundërshtarë, do kërkonte t’u drejtohej anëtarëve të PD-së me kërkesë për t’u zgjedhur me referendum.
Komisioni zgjedhor nëpërmjet Eno Bozdos, zbuloi të rejat që do jenë në procesin zgjedhor.
“Ndryshimi i parë, administrimi i procesit zgjedhor. Çdo kandidat të caktojë pranë komisionit tonë një vëzhgues të tij të përhershëm që ka akses të plotë në veprimet e komisionit, merr pjesë në gjithë mbledhjet e merr fjalën kur ka propozime apo ankesa. Ndryshimi vjen që në komisionin e votimit e numërimit në degë, do të caktohet një përfaqësues në komisionin e votimit. Kandidatët dikur kishin vëzhgues e ka pasur ankesa për mënyrën si janë drejtuar vëzhguesit.
Për t’i dhënë fund kësaj praktike, tani kandidati do të ketë njeriun e tij në tavolinën e komisionit të votimit, ka akses të plotë mbi listën zgjedhore, mënyrën si bëhet identifikimi i votuesve e pastaj në numërimin e fletëve të votimit. Ndryshimi tjetër, që është thelbësor e ka qenë pikë e nxehtë në të gjitha debatet tona të brendshme: aksesi i kandidatëve në listat zgjedhore. Në emër të të dhënave personale, një akes i tillë s’ka qenë i mundur. Tani përcaktohet që komisioni ynë ka përgjegjësinë t’i japë akses të plotë e të menjëhershëm çdo kandidati në listën zgjedhore. Ky akses fitohet pas regjistrimit të kandidatit nga komisioni ynë”, deklaroi Bozdo.
Discussion about this post