Kreu i opozitës e ka injoruar fyerjen që i ka bërë kreu i shtetit gjatë një takimi me deputetin Gjekmarkaj në ambientet e Hotel Rogner. Në një interviste televizive, Kreu i Partisë Demokratike, Lulzim Basha e ka cilësuar Presidentin e Republikës si një njeri që tashmë ia dinë bëmat, duke mos i dhënë rëndësi fyerjeve publike.
“As unë, as demokratët nuk i kemi asnjë borxh Ilir Metës, dhe nuk ia zgjidhim dot hallet Ilir Metës. Demokratët ia njohin bëmat dhe gjëmat. E vetmja gjë që kam për të shtuar, t’iu kërkoj ndjesë të thellë demokratëve, edhe në emër të strukturave drejtuese, që nuk e kemi dëgjuar më mirë dhe më qartë zërin e tyre”, shprehet Basha.
Nga ana tjetër, vetë Meta ka paralajmëruar një konferencë pasditen e sotme, si një kundërpërgjigje ndaj deklaratave të kryedemokratit për “Trekëndëshin e Bermudës”.
Po ashtu Basha, i pyetur nëse ndan të njëjtin qëndrim me qeverinë e SHBA-së, se ish kryeministri Berisha është i korruptuar dhe minues i demokracisë, Basha zgjodhi të mos komentojë, ndërsa e konsideroi Berishën si një politikan që i ka mbaruar koha.
“Unë nuk e kam komentuar dhe nuk e komentoj vendimin e qeverisë amerikane. Përpjekja për të tërhequr njerëz që kanë sakrifikuar për këtë parti në një betejë me SHBA-në, është kriminale. Është një betejë që çon në asgjësimin e PD si e vetmja shpresë për ta nxjerrë Shqipërinë nga kjo gjendje. Sali Berisha ka demonstruar dy muaj e fundit se është një politikan që i ka mbaruar koha, është jashtë kohe nga mënyra se si është sjellë”, tha Basha.
Discussion about this post