Blerja e karburanteve po zhvillohet me tendera abuzivë thuajse në të gjitha bashkitë, duke reflektuar presionin e lartë të oligarkëve të naftës.
Kështu, Bashkia Gramsh, nën drejtimin e Besion Ajazi, duket sikur ka hartuar një prokurim të posaçëm për kërkesat dhe tekat e Kuqit. Bëhet fjalë për tenderin me objekt: ‘Blerje karburanti për ndihmën e administratës së bashkisë, drejtorive dhe sektorëve të vartës’. Bashkia ka planifikuar do të shpenzojë 180 milionë lekë për karburant për afatin 7 muaj (deri në 31 janar 2024).
Në dokumentet e tenderit mund të gjesh nga tabelat e përbërësve të cilësisë së dizelit deri tek mënyra e përdorimit të kartave elektronike EIDA me të cilat do të bëhet furnizimi, por nuk ka asnjë propozim konkret se sa do të jetë çmimi apo si do të përllogaritet. Këto me sa duket janë çështje e brendshme e kryetarit të bashkisë Besion Ajazit dhe Frident Kuqit.
Siç duket, i frikësuar se mund të hetohet për shpërdorimin e detyrës, Ajazi nuk e ka firmosur vetë tenderin, por ka urdhëruar nënkryetarin e tij. Ky i fundit është marrë me hartimin e skemës për të mbyllur shpejt këtë projekt dhe për të xhiruar 180 milionë lekë nga arka e bashkisë tek ajo e Kuqit.
Në dokument tregohet se 21 mars 2024 ka qenë data e fundit për dorëzimin e ofertave dhe deri në atë ditë ka shfaqur interes vetëm kompania EUROPETROL DURRES SHQIPERI, në pronësi të Frident Kuqit.
Kjo kompani ka bërë propozimin me vlerë 180 milionë lekë, pra të njëjtë me atë të fondit limit. Në cilën pikë të ligjit për ‘Prokurimet Publike’ e gjen të drejtën ky zyrtar që e vazhdon këtë tender? Procedura duhej anuluar në pritje të një oferte të përshtatshme. Por, Ajazi ia dorëzoi kontratën Frident Kuqit pa pyetur për rregullat. A jemi para një pazari me buxhetin e bashkisë?
Ky tender ka marrë “Flamurin e kuq” nga portali monitorues Open Data Albania, që është shenja e riskut të korrupsionit.
Biznesmeni Kuqi zotëron edhe rrjetin e pikave të shitjes me pakicë të karburanteve “Eida” përmes së cilës siguroi fitime të mëdha, kur në të gjithë botën pati luhatje të çmimit të naftës. Asaj kohe kjo kompani përfitoi nga rasti dhe gjithmonë e shiste naftën shumë shtrenjtë se tregu në rajon edhe Europë.
Por Kuqi ka edhe famë te keqe për veprime mafioze. Kujtojmë se në vitin 2019, Frident Kuqi u mor nën hetim nga Prokuroria e Tiranës për “Heqje të paligjshme të lirisë” dhe “keqtrajtim personi”, pasi së bashku me persona të tjerë ende të paidentifikuar, dhunuan dhe morën peng pronarin e një karburanti në qytetin e Përmetit, 60-vjeçarin Gëzim Ibrahimi.
Gjithsesi ajo ngjarje u harrua shumë shpejt dhe Kuqi vazhdon të jetë partner i zyrtarëve të korruptuar duke përfituar tendera pa garë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post