Protesta e radhës para Bashkisë Tiranë do të zhvillohet paraditen e së enjtes. Kjo e bë e ditur nga anëtari i kryesisë së Partisë Demokratike, Belind Këlliçi, këtë të hënë, gjatë një deklarate nga selia blu.
Ashtu si të premten e kaluar, tubuesit pritet të kërkojnë dorëheqjen dhe arrestimin e Veliajt.
Nga selia blu, Këlliçi i ka bërë thirrje SPAK të nisë hetimet për kryebashkiakun Erion Veliaj të cilin e ka quajtur si pronarin faktik të inceneratorit të Tiranës dhe “kreun e organizatës kriminale 5D”.
Për Belind Këlliçin, qëndrimi në detyrë i Erion Veliajt, i jep mundësi këtij të fundit të prishë provat dhe zhdukjen e dokumenteve zyrtare.
“Afera e inceneratorit është grabitja korruptive më e dokumentuar me prova të pamohueshme, ndaj mos reagimi i deritanishëm i organit të akuzës dhe frika për të përmendur emrin e Erion Veliajt në dosje, janë tregues të qartë të kapjes dhe shantazhit që Veliaj po ushtron mbi SPAK. Qëndrimi i Veliajt në detyrë, i jep atij mundësinë e prishjes së provave dhe zhdukjes së dokumenteve zyrtare, që e implikojnë atë drejtpërdrejtë në këtë aferë”, deklaroi Këlliçi.
Këlliçi lajmëron gjithashtu një tjetër protestë para Bashkisë së Tiranës, ditën e enjte në orën 11:00.
“Ftoj sërish qytetarët dhe banorët e Tiranës, të dalin në protestë përpara Bashkisë Tiranë, ditën e enjte, më datë 11 prill, ora 11:00, për të kërkuar largimin urgjent nga detyra të Erion Veliajt dhe çuarjen e tij përpara drejtësisë”, theksoi Kelliçi.
Sheshi para bashkisë Tiranës pa një tjetër protestë këtë të hënë. Tubuesit ishin përfaqësues të komunitetit rom të cilët hodhën akuza ndaj Veliaj se po u mohon të drejtën e strehimit.
Discussion about this post