Bie makina nga lartësia 30 metra, vdes pasagjeri

Një aksident ka ndodhur sot në Kosovë, në rrugën Reqan-Luginë e Epërme të Suharekës, ku si pasojë një person ka humbur jetën.

Zëdhënësi i Policisë së Kosovës për rajonin e Prizrenit, Vesel Gashi, ka konfirmuar se si pasojë e këtij aksidenti ka vdekur pasagjeri 74-vjeçar, ndërsa është lënduar edhe shoferi 20-vjeçar. Shkak i këtij aksidenti, siç bëri të ditur Gashi, është mospërshtatja e shpejtësisë me kushtet e rrugës.

“Aksidenti ka ndodhur në rrugën Reqan-Luginë e Epërme. Vozitësi duke mos përshtatur shpejtësinë me kushtet e rrugës, ka humbur kontrollin dhe ka rënë në një lumë nga një lartësi rreth 30 metra. Shoferi i moshës rreth 20-vjeç, ka pësuar lëndime, ndërsa pasagjeri i moshës rreth 74-vjeçar ka ndërruar jetë”, tha Gashi, duke shtuar se gjendja shëndetësore e shoferit, tani pas trajnimit mjekësor, është stabile.

Ai shtoi se të gjitha njësitet relevante kanë dalë në vendin e ngjarjes dhe po merren me rastin në fjalë.