Vendimi për të kthyer rrugën e Rinasit vetëm me një sens lëvizjeje nga Tirana drejt Fushë-Krujës dhe jo anasjelltas siç ishte më parë nuk ka qenë vetëm një mendim i ARRSH-së për lehtësimin e lëvizjes, por mësohet se ka qenë një ndikim i drejtpërdrejtë i biznesmenit Shefqet Kastrati te kryeministri Rama.
Biznesmeni i njohur për lidhje të ngushta me qeverinë aktuale, bashkë me një grup banorësh kishte kërkuar për interesat personale pranë qeverisë që rruga e Rinasit të jetë vetëm me një sens lëvizjeje dhe jo anasjelltas, siç ka funksionuar që në ditën e parë të krijimit të saj. Këto interesa lidhen ngushtë, jo vetëm me pikat e karburantit që ai zotëron, por së pari për koncesionin e aeroportit të Rinasit. Në këto kushte, ARRSH vendosi me pretendimin për lehtësimin e trafikut, që ajo rrugë, nga Qafë Kashari të përdoret vetëm në drejtim të Fushë-Krujës dhe jo në kahun tjetër. Të gjithë shtetasit që vinin nga veriu në drejtim të Tiranës duhej të përdornin rrugën e Vorës, ose të Kamzës për të mbërritur në kryeqytet.
Ky vendim, jo vetëm që shkaktoi trafik të rënduar, por solli dhe shumë probleme për banorët e Rinasit, të cilët prej katër ditësh u hodhën në protestë, duke bllokuar komplet këtë rrugë. Argumenti kryesor i tyre ishte se kjo shkaktonte probleme në përditshmërinë e tyre, për fëmijët në shkollë, për marrjen e shërbimeve mjekësore, për kryerjen e pazareve të ditës e deri te kujdesi për bizneset dhe tokat e tyre bujqësore.
Megjithatë, kur një protestë është e pastët për nevojat qytetare, pa ndërhyrje politike, ashtu siç ishte dhe kjo e banorëve të Rinasit, atëherë bien edhe mitet. Kështu duket se ka rënë edhe miti i Çet Kastratit, i cili ishte i vetmi që përfitonte nga ky vendim absurd i ARRSH-së, që për interesa okulte tentoi t’i hidhte hi syve të qytetarëve, me pretendimin se kjo bëhet për të lehtësuar trafikun. Por janë dashur vetëm katër ditë protesta për të rrëzuar këtë vendim absurd dhe për të sprapsur oligarkët e Ramës.
Discussion about this post