Birësimi i fëmijëve nga persona që janë pjesë e LGBT mbetet një temë mjaft sensitive që ngjall gjithmonë diskutime. Politikani Genc Pollo është shprehur se vendi ynë ende nuk ka standartet e duhura, që përkojnë me ato europiane apo ndërkombëtare, që të mund të mundësojë birsëmimin e fëmijëve nga Çiftet LGBT. Sipas Pollos, as martesat brenda së njëjtës gjini nuk aplikohen njësoj siç kërkojnë standartet ndërkombëtare dhe as ndërhyrjet në Kodin e Familjes.
“Ka vetëm shtrembërime nga qeveria e nga lobistë ideologjikë në favor të neodogmës e të mbajtjes së pushtetit!”, shprehet ai, teksa shton se këto ndryshime duhen kundërshtuar.
Qeveria shqiptare riktheu diskutimet mbi lejimet e birësimit të fëmijëve edhe nga çiftet homoseksuale, duke i premtuar komunitetit LGBT, se do të njihen ligjërisht me ndryshimet në kodin e familjes, duke u dhënë mundësinë e birësimeve. Për pasojë, edhe anëtarët e komunitetit LGBTI+ do të kenë të drejtën e birësimit të një fëmijë, apo të regjistrimit të foshnjes.
Në propozimet e bëra me herët nga komuniteti “LGBTQI+” për këtë pikë kërkohet që neni 163 që saktëson termin “mes burrit dhe gruas që jetojnë në çift, e karakterizuar nga një jetë e përbashkët, që paraqet një karakter stabiliteti dhe vazhdueshmërie” të zëvendësohet “mes 2 personave që jetojnë në çift, e karakterizuar nga një jetë e përbashkët, që paraqet një karakter stabiliteti dhe vazhdueshmërie”.
Aktualisht Kodi i Familjes lejon që fëmijët të birësohen vetëm nga prindër heteroseksual të cilët mund të jenë të kurorëzuar ligjërisht apo vetëm bashkëjetojnë. Gjithashtu birësimet lejohen sipas ndryshimeve edhe nga një person i vetëm.
“Nisur nga evoluimi i shoqërisë shqiptare drejt pranimit të bashkëjetesës jashtë martesës, nga rritja e numrit të bashkëjetesave, si edhe nga fakti që bashkëjetesa e vazhdueshme dhe e qëndrueshme e një burri dhe një gruaje njihet si formë e krijimit të familjes nga legjislacioni shqiptar, është vlerësuar nga hartuesit e këtij projektakti t’u njihet e drejta për të birësuar një të mitur së bashku edhe dy bashkëjetuesve heteroseksualë, që janë të angazhuar në një bashkëjetesë të vazhdueshme dhe të qëndrueshme, sipas kuptimit që neni 163 i Kodit i jep bashkëjetesës. Kjo zgjidhje është në përputhje me standardet e vendosura nga Konventa e rishikuar e KiE-së “Për birësimin e fëmijëve”, e vitit 2008. Sipas pikës 2, të nenit 7, të Konventës, shtetet janë të lira ta shtrijnë birësimin edhe për çiftet heteroseksuale që bashkëjetojnë në një bashkëjetesë të qëndrueshme. Kjo nuk është një normë detyruese e Konventës”, thuhet në relacion.
Discussion about this post