Presidenti Ilir Meta ka uruar homologun e tij bullgar, Rumen Radev, për rizgjedhjen për herë të dytë në postin e Presidentit të Bullgarisë.
Meta shkruan në Facebook se gjatë mandatit të ri të Radev, marrëdhëniet mes dy vendeve do të forcohen më shumë, jo vetëm në spektrin politik, por edhe në arsim, kulturë apo turizëm.
“Jam i bindur se falë vullnetit, vizionit dhe vlerave të përbashkëta euroatlantike marrëdhëniet e miqësisë dhe të bashkëpunimit midis Shqipërisë dhe Bullgarisë, jo vetëm ato politike, do të fitojnë një dinamikë të re, veçanërisht në fushën e bashkëpunimit ekonomik, turizmit, kulturës, arsimit dhe zhvillimit infrastrukturor. Sot, si asnjëherë tjetër, adresimi i sfidave me të cilat shoqëritë tona po përballen, kërkon një bashkëpunim edhe më të ngushtë mes vendeve tona në rajonin e Europës dhe më gjerë, sidomos në kuadër të partneritetin të NATO-s”, shkruan Meta.
Ndër të tjera, kreu i shtetit falenderon Bullgarinë për mbështetjen që i ka dhënë vendit tonë në rrugën drejt integrimit europian.
“Dëshiroj të shpreh mirënjohjen për mbështetjen, që Bullgaria i ka dhënë Shqipërisë dhe të gjitha vendeve të Ballkanit Perëndimor, në kuadër të procesit të integrimit në Bashkimin Europian, e njëkohësisht të shpreh bindjen se rizgjedhja Juaj si President i Bullgarisë do të nxisë edhe më shumë mbështetjen bullgare për vendet kandidate të rajonit tonë në këtë proces të rëndësishëm, si në planin strategjik, ashtu edhe në atë të stabilitetit rajonal”, shprehet ai.
Discussion about this post