GJKKO ka lënë në fuqi masën e arrestit me burg për Rexhep Rapin, i njohur me nofkën Kep Arapi. Nga raportimet mësohet se në sallën e gjyqit, gjatë seancës për rivlerësimin e masës së sigurisë, Kep Arapi ka mohuar akuzat.
Gjithashtu GJKKO ka lënë në fuqi masat e sigurisë arrest me burg edhe për Dedan Gjonin, ish-shefin e komisariatit i arrestuar më herët dhe Algert Rapin, nipin e Kep Arapit.
Arrestimet erdhën pasi SPAK arriti të zbërthejë bisedat në “Sky” nga ku rezultoi se Kep Arapi bashkëpunoi me 3 persona të tjerë në atentatin ndaj Xhevdet Plakut.
Sipas raportimeve, rezulton se Kep Arapi ka dalë në Sky Eç në biseda me ish-zyrtarin e policisë së Durrësit, Dedan Gjoni, aktualisht i arrestuar për një tjetër vepër penale.
Nga hetimet ka rezultuar se Dedan Gjoni ishte përfshirë grup kriminal në tentativë për të vrarë një person, i cili ishte në përplasje të forta me Rexhep Rapin ose Kep Arapin, i përfshirë në veprimtari kriminale. Pjesëtarë të grupit të strukturuar kriminal, i kanë kërkuar Dedan Gjonit që të nxirrte në pritë një person me qëllim për ta vrarë.
Sipas të dhënave, në kohën kur drejtonte Komisariatin e Shijakut, e ka thirrur këtë person në komisariat për ta marrë në pyetje. Sipas të dhënave, ish-punonjësi i policisë, Dedan Gjoni, e ka thirrur në komisariat dhe më pas ka lajmëruar anëtarët e grupit kriminal duke u nisur foto dhe orarin dhe në këtë mënyrë ka nxjerrë në pritë shënjestrën, i cili fatmirësisht ka arritur t’i mbijetonte atentatit.
Rezulton po ashtu se urdhri për të kryer këtë krim të rëndë është dhënë nga Holanda dhe dyshohet se lidhet me prishjen e pazareve të drogës.
Discussion about this post