Kryenegociatori i Kosovës, Besnik Bislimi, ka deklaruar pas një takimi të zhvilluar në Bruksel se bisedimet për çështjen e përdorimit të dinarit serb në Kosovë kanë dështuar.
Ai theksoi se pala serbe nuk erdhi me përgjigje të pritura, por në vend të kësaj paraqiti propozime të reja.
Pas një raundi disaorësh negociatash, Bislimi shprehu pakënaqësi për qasjen e palës serbe dhe tha se nuk ka pritje për takime të reja, nëse nuk tregohen si pjesëmarrëse konstruktive.
“Ne në esencë kemi dhënë përgjigje ndaj propozimit të Z. Lajçak dhe kemi treguar ku mund të bëjmë kompromise,” u shpreh Bislimi për gazetarët.
“Ndërsa nga ana e Serbisë, panë një tendencë largimi nga propozimi që parashtruar nga ai. Kjo tregon që për Serbinë kjo çështje nuk ka asnjë lloj urgjence,” shtoi ai.
Pala serbe, e përfaqësuar nga kryenegociatori Petar Petkoviç, insiston se ka prezantuar “gjashtë propozime të reja konstruktive,” të cilat sipas tij u hodhën poshtë nga Prishtina.
“Ne jemi të hapur për dialog, sepse synojmë një zgjidhje,” deklaroi Petkoviç, i cili nuk ofroi detaje të mëtejshme mbi përmbajtjen e propozimeve serbe.
Ky raund i negocjatave vjen si vijim i përpjekjeve për zgjidhjen e çështjes së dinarit serb, e cila është në diskutim në shtatë takime të njëpasnjëshme në nivel të kryenegociatorëve.
Përkundër gjashtë takimeve paraprake, palët nuk kanë arritur të gjejnë një terren të përbashkët.
Ndërmjetësuesi i dialogut nga BE-ja, Mirosllav Lajçak, dhe zëdhënësi i BE-së, Peter Stano, kanë shprehur pritshmëri që Kosova dhe Serbia të demonstrojnë gatishmëri për të arritur një zgjidhje praktike dhe të përkohshme.
Ky ishte takimi i shtatë mes kryenegociatorëve në muajt e fundit për këtë çështje, pasi në gjashtë takimet paraprake ata nuk arritën pajtim për ndonjë zgjidhje kompromisi
Discussion about this post