Shaqir dhe Algert Alcani, babë e bir dyshohet se kanë paguar persona me rekorde kriminale që të përndiqnin e kërcënonin biznesmenin Eral Myftaraj. Klodiana Lala raporton për Balkanweb se bëhet fjalë për njerëz nga Lezha e Burrelli, por që jetojnë në Kamëz. Nuk dihet ende nëse ka persona të tjerë të përfshirë përveç atyre që janë arrestuar.
Deri tani janë vënë në pranga Algert Alcani, 27 vjeç; Edmir Boci, 37 vjeç, Shaqir Alcani, 62 vjeç. Ndërsa i shpallur në kërkim është 38-vjeçari me inicialet L.K., për të cilin RENEA ka dalë në terren.
Si ndodhi ngjarja
Myftaraj, që zotëron një kompani me zyrat qendrore në Cërrik fitoi një tender 1 milion eurosh për furnizimin me lëndë drusore në shkolla. Ai u kërcënua që të hiqte dorë, në të kundërt do t’i vrisnin anëtarët e familjes.
Por, biznesmeni s’u tërhoq dhe bëri kallëzim në polici, pas të cilit ndodhën dhe arrestimet. Babë e bir, Shaqir dhe Algert Alcani dyshohet se janë organizatorët.
Kjo pasi, Shaqir Alcani është pronar i ‘Alcani Sh.p.k’ që fitonte thuajse gjithë tenderat për lëndët drusore që jepeshin nga Bashkia Tiranë dhe këtë herë s’e kanë pranuar humbjen përballë Myftarajt.
Discussion about this post